First Quantum компани Замби дахь төслөө эрчимжүүлнэ 

Ч.Сансар

Канадын First Quantum Minerals компани Замбийн Mimosa Resources компанитай хамтран Fishtie зэсийн төслийн хэрэгжилтийг эрчимжүүлэх гэрээ байгууллаа.

Эдгээр компаниуд 2012 оноос хойш тус ордод хайгуул хийж байгаа бөгөөд одоо Fishtie төслийн хүрээнд үйлдвэрлэлийг 2026 онд эхлүүлэхээр төлөвлөж байна. Энэ 10 жилийн эцэс гэхэд жилд 30,000 тонн зэс олборлох төлөвтэй байна.

Mimosa Resources одоогоор Fishtie төслийг хэрэгжүүлдэг Kashime Copper Ltd-ийн 37.5%-ийг эзэмшдэг. First Quantum-тай байгуулсан гэрээний хүрээнд төслийн ТЭЗҮ-г боловсруулж, шаардлагатай санхүүжилт босгох бөгөөд үр дүнд тус компани эзэмшлээ 75% хүртэл өсгөнө гэж компаниуд мэдэгдэв.

First Quantum нь Fishtie ордоос илүү өргөн талбайд санхүүжилт болон хайгуул хийх үүрэг хүлээсэн. Mimosa Resources нь уг төсөлд шаардлагатай 200 сая ам.долларын хөрөнгө босгох ажлыг удирдана.

First Quantum Панамд оршдог зэсийн аварга том уурхайг хаахыг шаардаж буй  энэ үед гэрээ байгуулжээ. Уг уурхай дэлхийн зэсийн үйлдвэрлэлийн 1.5%, Панамын ДНБ-ий 5%, бараа бүтээгдэхүүний экспортын 75%-ийг бүрдүүлдэг.

Замби улс энэ арван жилийн эцэс гэхэд зэсийн үйлдвэрлэлээ гурав дахин нэмэгдүүлэхээр төлөвлөж байгаа бөгөөд саяхан энэ салбарт хөрөнгө оруулалтыг татахын тулд татварын бодлогоо өөрчилжээ.

First Quantum Minerals компанийн менежер Годвим Бин мэдэгдэлдээ "Бид Замби дахь хөрөнгө оруулалтын орчин сайжирч байгаа энэ үед энэ нөөцийг хөгжүүлэх ёстой гэж үзэж байна" гэжээ.

First Quantum нь Африкийн хоёр дахь том зэс үйлдвэрлэгч Замбид оршдог Кансанши уурхай, хайлуулах үйлдвэр, Сентинел уурхайг эзэмшдэг.

Эх сурвалж: Mining.com