Siemens өндөр технологи, чанартай бүтээгдэхүүн танилцуулна

Future Mongolia олон улсын үзэсгэлэн яармагт оролцож буй томоохон компаниудын төлөөллийг танилцуулж байна. Энэ удаад инженеринг технологийн чиглэлээр дэлхийд тэргүүлэгч Siemens компанийн Монгол дахь Төлөөлөгчийн газрын захирал Ж.Бадамдоржтой ярилцлаа.

Siemens инженеринг технологийн чиглэлээр дэлхийд тэргүүлдгийн нууц нь чухам юунд оршдог юм бол?

Siemens компани нь инженеринг технологийн дэлхийн анхны компаниудын нэг бөгөөд энэ жил манай 165 жилийн ой тохиож байгаа. Өнөөдрийн байдлаар дэлхийн 190 гаруй улс оронд 400-гаад мянган ажилтантай. Үүний нэг салбар нь Монголд байгаа манай оффис юм.

Өнгөрсөн онд 96 тэрбум ам. долларын орлого олж, 111 тэрбум долларын шинэ захиалга хүлээн авсан бөгөөд 5.1 тэрбум долларыг судалгаа шинжилгээнд зарцуулсан нь саяхны Монгол улсын ДНБ-тэй тэнцэх хэмжээний дүн гэсэн үг л дээ.

Siemens-ийг тодорхойлдог дараахь хэдэн зүйлс байдаг гэж хэлж болно. Эдгээр нь, 1-рт чанар, 2-т технологийн шинэчлэл, 3-т хариуцлагатай байдал. Бидний хувьд өөрсдийн бүтээгдэхүүн, шийдлүүдийг боловсруулахдаа эдгээрийг хэрэглэх эцсийн хэрэглэгчдийн хувьд тэдний бизнес, үйлдвэрлэлийг үр ашигтайгаар дэмжих, эдийн засгийн хувьд хэмнэлттэй, найдвартай ажиллагааг хангах ёстой гэсэн шалгууруудыг тавьдаг.
Siemens их том компани л даа, тиймээс хүмүүс тэр болгон үйл ажиллагааных нь чиглэлийг бүрэн мэддэггүй байх.

2001-2004 оны хооронд манай компани 2020, 2050 он гэхэд дэлхий нийтийн хувьд ямар асуудлууд тулгамдсан  байх вэ, тэдгээрийг шийдвэрлэхэд Siemens хэрхэн хувь нэмрээ оруулж чадах вэ? гэсэн асуултуудад хариулахаар маш том, нарийн судалгаа хийсэн юм. Энэхүү судалгааны үр дүнд хүн амын насжилт уртасч, хот газар төвлөрөл ихсэх бөгөөд үүнийг дагаад шаардлагатай дэд бүтэц, тээвэр, эрчим хүчний хэрэгцээ асар нэмэгдэх тооцоо гарсан. Энэ нь хомсдож буй байгалийн баялгийг ухаалгаар зарцуулах, тэдгээрийг орлох шинэ технологийн эрэл хайгуул хийх, байгаль орчинд ээлтэй технологи бий болгох шаардлагуудыг тавьж байгаа юм.

Жишээ нь, хүлэмжийн хий түүхэнд байгаагүй хэмжээнд хүрч 2001-2010 оны хооронд XIX зуунаас хойших хамгийн дулаан арван ажил болж бүртгэгдсэн байгаа нь дэлхийн гадаргын дундаж температурыг 0.76С градусаар нэмэгдэхэд хүргэсэн байдаг юм байна. Глобалчлалын хувьд, 1969 онд 10,000 олон улсын компани байсан бол 2008 онд 82,100 болж өссөн, 2030 он гэхэд хөгжиж буй улс орнууд дэлхийн нийт бүтээгдэхүүний 3/2-г нийлүүлэх бөгөөд дэлхийн түүхий эдийн худалдааны хэмжээ ерөнхийдөө тогтмол байгаа боловч үнэ нь жил тутам дунджаар 20 хувиар нэмэгдэж байгаа гэсэн тоонууд гарсан. Тиймээс дээрх судалгааны үр дүнд Siemens компани өөрийн үйл ажил­лагааны үндсэн чиглэлийг Эрчим хүч, Хот ба Дэд бүтэц, Аж үйлдвэр, Эрүүл Мэнд гэсэн салбарууд дээр төвлөрүүлж дэлхийн нийтийн тулгамдсан асуудлуудыг шийдвэрлэхэд найдвартай, чанартай, байгаль орчинд ээлтэй бүтээгдэхүүн шийд­лүү­дийг боловсруулахад анхааран ажиллаж байна.

Siemens Future Mongolia үзэсгэлэн худалдаанд оролцож байгаа хамгийн том компаниудын нэг, энд ямар ямар чиглэлээр оролцож байгаа вэ?

Future Mongolia-ийн эхний өдөр бид уул уурхай, аж үйлдвэрийн салбарт зориулсан Siemens Day буюу Siemens-ийн өдөрлөг зохион байгуулах гэж байна.
Үүнд уул уурхай, боловсруулах үйлд­вэрүүд болон конвейер тээврийн шийдлүүд болон бүтээгдэхүүнүүдийн зэрэгцээ Siemens-ийн засвар үйчилгээ, сэлбэг хангамжийн бодлогыг танилцуулах юм.

Үйлдвэрүүд, уурхайнуудын хувьд нэг өдөр л тоног төхөөрөмж нь ажиллахгүй сул зогсох нь санхүүгийн хувьд маш их алдагдалтай байдаг шүү дээ. Тиймээс ч манайхан сүүлийн үед үүнийг ойлгож чанарыг эрхэмлэн сонголтоо хийдэг болсон нь бидэнд анзаарагдаж байгаа.

Дээрх чиглэлийн Siemens-ийн мэргэжилт­нүүд болон холбогдох удирдлагууд ХБНГУ болон БНХАУ-аас хүрэлцэн ирэх тул монголчуудын маань хувьд тэд нартай уулзаж ярилцах, санал бодлоо солилцож, зөвлөлдөх сайхан боломж болно гэж итгэж байгаа.

Siemens гэхээр хүмүүс ихэнхдээ гар утас үйлдвэрлэдэг компани гэж ойлгодог. Монголд ямар ямар салбарт Siemens-ийн бүтээгдэхүүн, технологийг хэрэглэж байгаа вэ?

Үнэхээр хүмүүс ерөнхийдөө Siemens гэхээр гар утас гэж л голдуу мэддэг. Гэхдээ мэргэжлийн хүмүүс Siemens-ийн шийдэл, систем, автоматжуулалт, тоног төхөөрөмжийг их сайн мэднэ л дээ. Тиймдээ ч манай бүтээгдэхүүн байхгүй аймаг Монгол улсын хэмжээнд байхгүй гэж хэлж болно. 

Манай улсад эрчим хүч, хүнд болоод хөнгөн аж үйлдвэр, харилцаа холбоо, эмнэлгийн салбарт монгол мэргэжилтнүүд маань Siemens-ийн бүтээгдэхүүн, шийдлүү­дийг ашиглан улс орныхоо эдийн засаг, хөгжил дэвшилд үнэтэй хувь нэмэр оруулан ажиллаж байгаад   баяртай байдаг.

Иймд бид бидний түнш болсон хэрэг­лэгчдэдээ хөрөнгө оруулалт болоод ашиг­лалтын зардлын хувьд хамгийн өндөр эдийн засгийн үр ашигтай, Монголын эрс тэс уур амьсгалд тохирсон, найдвартай ажил­лагааг хангасан шийдлүүдийг санал болгохын зэрэгцээ Монгол дахь сервис үйлчилгээнд онцгойлон анхаарч байна. Мөн монгол мэргэжилтнүүдээ орчин үеийн техник технологи дээр дадлагажуулан сургах, сертификатжуулан мэргэшүүлэх талаар шат дараалсан алхмуудыг хийж байгаа.

Монголчуудын  юмны учрыг их амархан олж хурдан сурдаг чанарыг Германчуудын системтэй нарийн тооцож, чанартай, алсыг харсан шийдэлд гаргадаг туршлагатай хос­луулан ажиллахад манай улс орны өмнө тулгамдаад байгаа асууд­луудын нэлээдийг шийдвэрлэж болно гэж би хувьдаа боддог шүү.

Цаг зав гаргаж ярилцсанд баярлалаа. Ажлын өндөр амжилт хүсье.

Ярилцсан О.Хосцэцэг