Компанийн мэдээлэл

“Рио Тинто” 4 тэрбум доллар зээлэхээр “мордов”

2013-02-14

“Рио Тинто” компани “Оюутолгой” төслийн хоёр дахь үе шатны санхүүжилтийг олон улсын банк санхүүгийн байгууллагуудаас зээлэхээр хөөцөлдөж байна гэсэн мэдээлэл цацагдаад байсан билээ. Тэгвэл тус компани “Дэлхийн банк” болон бусад санхүүгийн байгууллагуудаас нийт 4 тэрбум ам.доллар зээлэх саналаа урьдчилсан байдлаар өргөн барьсан тухай “Блүмбэрг” мэдээлжээ. Энэ дундаа хоёр тэрбум ам.долларыг банкуудаас, үлдсэнийг нь хөрөнгө оруулалтын сангуудаас зээлэх юм байна. Банкаас зээлэх санхүүжилтийн зарим хэсгийн хүү олон улсын банк санхүүгийн зээлийн дундаж хүүнээс 2-3 хувиар өндөр, хугацаа нь 12 жил болж магадгүй байгаа ажээ.

Нөгөөтэйгүүр, олон улсын ногоон байгууллагууд “Дэлхийн банк” болон “Олон улсын санхүүгийн корпораци”-ийг байгаль орчинд хамгийн бага нөлөөлөхүйц шийдлийг санал болгосон төсөлд хөрөнгө оруулах зорилгоосоо ухарч байна хэмээн ихээхэн шүүмжилсээр байна. “Дэлхийн банк” хүлэмжийн хийн ялгарлыг дэмжих нүүрсний цахилгаан станцын төсөлд хөрөнгө оруулах гэж буйг онцолж буй юм. Мөн малчдын хэвийн аж амьдралыг хангах, усны асуудлыг баталгаажуулах гэх мэт олон асуудлыг нарийн төлөвлөөгүйг тэд ярьж, шүүмжилж буй юм.

“Оюутолгой” төслийн хөрөнгө оруулалтын тухайд Монголын Засгийн газар, “Рио Тинто”-гийн төлөөлөл өнгөрсөн лхагва гаригт Улаанбаатарт хэлэлцсэн ч дараа дараагийн уулзалтуудаар нэгдсэн ойлголтод хүрэхээр болоод байгаа билээ. Үүнтэй зэрэгцэн, “Рио Тинто” төслийн хоёр дахь үе шатыг эхлүүлэхэд шаардлагатай санхүүжилтийг баталгаажуулж чадах эсэхийг харуулах мөч тун ойртсоор байна. Тэд ирэх сарын дунд үе гэхэд зээл авах саналын хариугаа авах төлөвтэй байна.

Б.Төгс

СЭДЭВ

Ашигт малтмал

Эрдэс

Стратегийн орд

Дэд бүтэц

Судалгаа