Р.Фридланд: Нэмэлт хувьцаанд бүгд оролцох ёстой

“Оюутолгой” төслийн 66 хувийг эзэмшдэг Turquoise Hill Resources компани 2.4 тэрбум ам.долларын санхүүжилт босгохоор “rights offering” буюу нэмэлт хувьцаа гаргахаар төлөвлөж байгаа билээ. Тус компани ойролцоогоор 1 тэрбум хувьцаа нэмж гаргахаар төлөвлөж байна. Нью-Йорк, Торонтогийн бирж дээр гаргах энэхүү нэмэлт хувьцааг тус компани өөрийн хувьцаа эзэмшигч, хөрөнгө оруулагч нартаа арваннэгдүгээр сарын 25-ны өдрийн хаалтны ханшаас 42 хувийн хөнгөлөлттэй үнээр буюу 2.40 ам.доллараар (2.53 канад доллар) худалдах юм. Хувьцааг хөнгөлөлттэй үнээр худалдаж авах эрхийг биржүүдэд өнөөдрөөс арилжаалж эхэлнэ. Үүнтэй холбоотойгоор өнгөрсөн шөнө Нью-Йоркийн хөрөнгийн бирж дээр тус компанийн хувьцааны ханш 6,3 хувиар өссөн байна.

Нэмэлт хувьцаа арилжих ажил амжилттай болбол Turquoise Hill компани өөрийн стратегийн хөрөнгө оруулагч болох “Рио Тинто” компанид төлөх ёстой өрөө хугацаанд нь барагдуулж чадах юм.

Харин Тurquoise Hill компанийн  найман хувийг эзэмшиж буй Р.Фридланд энэ талаар “сэтгэлийн хөдөлгөөнтэй” мэдэгдэл хийгээд байна. Тэрбээр “Канадын “тэнэг”-үүд rights offering гэдгийг хувьцаа эзэмшилтийг нь хорогдуулсан зүйл биш гэдгийг ойлгохгүй байна. Тэд энэ арилжаанд бүгд адил идэвхтэй оролцох ёстой. Тэд эрхээ худалдаж аваад түүнийгээ хувьцаанд шилжүүлэх хэрэгтэй. Энэхүү арилжааны дараа “Оюутолгой” өргүй болно. “Оюутолгой” бүрэн хүчин чадлаараа ажиллаж, олборлосон бүтээгдэхүүний борлуулалтаас  750 сая доллар олно. Мөн Монголын Засгийн газраас 2 тэрбум долларын авлагатай болно” хэмээн CEO.CA блогийн хөтлөгч Tommy Humphreys-д мэдээлжээ.

Б.Төгс