Оюутолгойн метал авалт 86.4 хувьд хүрчээ

“Turquoise Hill Resources” компани өнгөрсөн оны дөрөвдүгээр улирлын үйлдвэрлэлийн мэдээгээ гаргасан байна. Тодруулбал өнгөрсөн 2013 онд тус компани 66 хувийг нь эзэмшиж буй Оюутолгой төслийн үйлдвэрлэлийн хүрээнд 76 мянган тонн зэс үйлдвэрлэжээ. Зэсийн баяжмалын үйлдвэрлэл дөрөвдүгээр улиралд гуравдугаар улирлынхтай харьцуулахад харьцангуй өсөлттэй гарчээ. Түүнчлэн баяжуулах үйлдвэрийн метал авалтын үзүүлэлт ч нэмэгдсээр байгааг тус компанийн Гүйцэтгэх захирал Кэй Прэстли мэдэгдэхийн зэрэгцээ аюулгүй ажиллагааны үзүүлэлт тун сайн байгааг тэмдэглэжээ.

Оюутолгойн метал авалтын түвшин өнгөрсөн оны гуравдугаар улиралд зэсээр 81.7 хувь, алт 66.3 хувь, мөнгө 54.9 хувь байсан бол дөрөвдүгээр улиралд зэсийнх 86.4 хувь, алт 71.2 хувь, мөнгө 57.2 хувьд хүрчээ. Зэсийн метал авалтын хувьд энэ нь Эрдэнэт үйлдвэртэй адилсаж буй хэрэг юм. Харин Оюутолгойн баямжал бүтээгдэхүүн дэх зэсийн дундаж агуулга 26.4 хувьтай байгаа ажээ.

Үйлдвэрлэлийн мэдээ (2013 оны байдлаар)	2013 он. 1-р хагас	2013 он. 3-р улирал	2013 оны 4-р улирал	Оны дундаж
Боловсруулсан хүдэр (‘000 тонноор)	4.430	8.052	7.835	20.317
Бутлагч руу орох хүдрийн дундаж агуулга (хүдрийн агуулга)
Зэс(%)	0.42	0.47	0.49	0.47
Алт (грам/тонн)	0.27	0.36	0.41	0.36
Мөнгө (грам/тонн)	1.31	1.39	1.44	1.39
Үйлдвэрлэсэн зэсийн баяжмал (‘000 тонноор)	50.2	110.3	129.5	290.0
Баяжмалын дундаж агуулга (% Зэс)	26.1	27.7	25.4	26.4
Нийт үйлдвэрлэсэн металууд Баяжмал дахь зэс (‘000 тонноор)	13.1	30.6	32.9	76.7
Баяжмал дахь алт (‘000 унцаар)	21	62	74	157
Баяжмал дахь мөнгө (‘000 унциар)	85	196	208	489
Борлуулсан баяжмал дахь металууд
Баяжмал дахь зэс (‘000 тонноор)	-	-	6.1	6.1
Баяжмал дахь алт (‘000 унцаар)	-	-	10	10
Баяжмал дахь мөнгө (‘000 унцаар)	-	-	36	36
Метал авалт (%)
Зэс	73.2	81.7	86.4	81.6
Алт	56.7	66.3	71.2	66.1
Мөнгө	47.8	54.9	57.2	54.2

Өнгөрсөн оны сүүлийн байдлаар тус компанийн үйлдвэрлэсэн баяжмалын 26.4 мянган тонныг Хятадын хайлуулах үйлдвэрүүд тээвэрлэсэн байжээ. Баяжмал бүтээгдэхүүний борлуулалт одоогоор үйлдвэрлэлийн хэмжээг гүйцэж чадахгүй байгаа ажээ.

Учир нь тус компанийн бүтээгдэхүүнийг худалдан авч буй зэс хайлуулах үйлдвэрүүдийн хоёр нь техникийн хүндрэлтэй байгаа ажээ. “Оюутолгой” компани тогтмол борлуулалтын хуваарьт шилжих боломжгүй байгаа бөгөөд зарим борлуулалтыг энэ оны хоёр, гуравдугаар улирал руу шилжүүлэн хойшлуулжээ.

Иймд энэ оны эхний улиралд багтаан Оюутолгойн баяжмалын агуулах байгуулахаар болоод байгаа ажээ.

Энэ онд Оюутолгойн баяжуулах үйлдвэр 150-175 мянган тонн зэс агуулсан баяжмал, 700-750 мянган унц алт үйлдвэрлэнэ гэж тооцоолж байна. Оны сүүл гэхэд баяжмалын үйлдвэрлэл, борлуулалтын харьцаа тэнцэж жигдрэх төлөвтэй байгаа ажээ.

Turquoise Hill-ийн хяналтын багцыг эзэмшиж буй “Рио Тинто” компани өөрийн шууд удирдлага дор байгаа аж үйлдвэрийн нэгжүүд, түүнийн дотор Оюу Толгой төслийн үйлдвэрлэлийн мэдээ, тайланг улирал тутам гаргаж олон нийтэд мэдээлдэг.

Энэ дагуу 2013 оны дөрөвдүгээр улирлын тайланг саяхан гаргасан байна.

Цаашид улирал бүрийн дараагийн сарын дундуур Оюу Толгой компанийн цахим хуудсанд (www.ot.mn) эдгээр мэдээг тавихаар болжээ. Дараагийн тайлангуудыг энэ оны дөрөв, долоо, аравдугаар сард тус тус гаргах ажээ.



Б.Төгс