Уул уурхайн ханган нийлүүлэлт, тоног төхөөрөмж, үйлчилгээний MINETECH үзэсгэлэн 7 дахь жилдээ зохион байгуулагдах гэж байна. Үзэсгэлэнгийн талаар МУУҮА-ийн Төр, олон нийттэй харилцах менежер Б.Батбилэгээс тодрууллаа.
Монгол улсад уул уурхайн салбарын маш олон үзэсгэлэн зохион байгуулагддаг. Эдгээр үзэсгэлэнгээс MINETECH юугаараа ялгардаг вэ?
Монголын Уул уурхайн үндэсний ассоциацийн /МУУҮА/ гишүүн байгууллагууд оролцдогоороо ялгардаг. Олборлогч компаниудад орчин үеийн, байгаль орчинд хор хөнөөл багатай, боломжийн үнэ өртөгтэй, чанартай техник, технологи нэн чухал байдаг. Тэдгээрийг гадаад орноос захиалахад цаг хугацаа алдахаас гадна асар их зардал шаардагдана. Маш их хөрөнгө мөнгө, цаг хугацаа зарцуулан байж сонгосон техник хэрэгслийнх нь сэлбэг хэрэгсэл ховор төдийгүй эзэмшиж ажиллуулах боловсон хүчин дутмаг байх нь түгээмэл. Тиймээс уул уурхайн үзэсгэлэн нь хайгуулынхан болон олборлогчдыг уул уурхайн тоног төхөөрөмж нийлүүлэгч, үйлчилгээ үзүүлэгчидтэй уулзуулах талбар нь болдог. Өөрөөр хэлбэл, салбарынхан бие биетэйгээ нүүр тулан уулзаж, худалдааны арга туршлагаа хуваалцан, харилцан нэгнээсээ суралцах чухал ач холбогдолтой юм.
Тэгвэл 7 дахь удаагийн MINETECH үзэсгэлэнгийн онцлог нь юу байх вэ?
МУУҮА-ийн 20 жилийн ой энэ жил тохиож байгаа. MINETECH үзэсгэлэнгийн үеэр ойн хүрээний олон арга хэмжээг зохион байгуулахаар төлөвлөж байна. Уламжлалт “Ассоциацийн өдөр”, боулингийн тэмцээн, ханган нийлүүлэгчдийн семинар зэрэг арга хэмжээг илүү өргөн цар хүрээнд, шинэлэг байдлаар зохион байгуулахаар зорьж байна. “Ханган нийлүүлэлтийн онцлог, сайн туршлага” семинарт “Эрдэнэт” үйлдвэр, “Оюутолгой”, “Эрдэнэс Тавантолгой” компанийн төлөөлөл оролцох юм. Үүнээс гадна ханган нийлүүлэлтийн чиглэлээр үйл ажиллагаа явуулдаг ассоциацийн гишүүн байгууллагуудтай хамтран зохион байгуулах арга хэмжээ ч бий. “Моннис” компанитай уул уурхайн машин, механизмын үзэсгэлэн, “Вагнер Ази” компанитай хүнд машин механизмын операторуудын ажил мэргэжлийн уралдааныг хамтран зохион байгуулна.
“Операторуудын ажил мэргэжлийн уралдаан”-ыг энэ жил шинээр зохион байгуулж байгаа юм байна?
Уул уурхайн салбарт үйл ажиллагаа явуулж буй компаниудын хүнд машин, механизмын операторуудын ур чадварыг сорих, туршлага солилцох, танилцуулах, нөхөрсөг харилцаа бий болгох зорилгоор энэхүү уралдааныг зохион байгуулж байгаа юм. Уралдаан “Вагнер Ази” компанийн сургалтын талбай дээр энэ сарын 26-ны өдөр явагдана. Мөн тус компанийн сургагч багш нарын ур чадварыг харуулсан хүнд машин, механизмын шоу үзүүлбэр болно.
Аливаа арга хэмжээг зохион байгуулахад ивээн тэтгэгч байгууллагууд чухал үүрэгтэй байдаг?
Үйлчилгээ үзүүлэгч, ханган нийлүүлэгчдэд зориулсан хамгийн анхны төдийгүй олон жил тогтвортой зохиогдож буй, нийлүүлэгч, худалдан авагчийн хэн хэнийх нь ашиг сонирхолд нийцсэн хямд, үр өгөөжтэй энэхүү арга хэмжээний Ерөнхий ивээн тэтгэгчээр “Эбрдигм Монгол”, “Хүндэт ивээн тэтгэгч”-ээр “Вагнер Ази тоног төхөөрөмж”, “Моннис”, “Алтан ивээн тэтгэгч”-ээр “Аодэ” компани тус тус ажиллаж байна.