“Алтан Рио Минералс” компани санхүүжилт босгов

“Алтан Рио Минералс” компани Европын сэргээн босголт, хөгжлийн банктай хийж байсан хувьцааны хаалттай арилжаа хаасныг мэдэгдсэн байна. Үүний дүнд ЕСБХБ “Алтан Рио Минералс” компанийн 16 сая 666 мянган ширхэг энгийн хувьцааг нэгжийг нь 0.06 ам.доллараар буюу нийт 999 мянга 960 ам.доллараар худалдан авчээ. Энэ нь ойролцоогоор компанийн 18.7% болж байгаа юм. Мөн ЕСБХБ тус компанид 5-10 сая ам.долларын хөрөнгө оруулалт хийх санхүүгийн гэрээ байгуулж байгаа аж. “Алтан Рио Минералс” компанийн Ерөнхийлөгч бөгөөд Гүйцэтгэх захирал Эван Жонс “Бид Европын Сэргээн босголт хөгжлийн банктай түншилж байгаадаа баяртай байна” хэмээсэн байна.

Европын сэргээн босголт хөгжлийн банк нь 59 улсын Засгийн газар болон олон улсын 2 санхүүгийн байгууллага хувьцааг нь эзэмшдэг, Ази, Европын 29 улсад хөрөнгө оруулсан санхүүгийн томоохон хөрөнгө оруулагч юм. 2006 оноос Монголд хөрөнгө оруулж эхэлсэнн бөгөөд 52 төсөлд 684 сая долларын хөрөнгө оруулалт хийсэн Монгол дахь хамгийн том хөрөнгө оруулалтын байгууллага. Тухайлбал МАК, “Шарын Гол” ХК, “Петро Матад” ХХК, “Энержи Ресурс” зэрэг томоохон компанид хөрөнгө оруулалт хийж байсан юм.

“Алтан Рио Минералс” компани нь Канадад төвтэй Монголд алт, зэсийн хайгуулын компани юм. Тус компани Ховд аймгийн нутагт байрлах зэс, алтны  “Чандмань-Ёл”, Төв аймгийн нутагт байрлах “Хавчуу” алтны төслийг хэрэгжүүлж байгаа бөгөөд ЕСБХБ-ны санхүүжилтийг эдгээр төслийн хайгуулын ажилд зарцуулахаар болжээ.

С.Болд-Эрдэнэ