Guildford 600МВт-ын станцын төслийг худалдаж авна

Австралийн хөрөнгийн биржид бүртгэлтэй “Guildford Coal” (ASX:GUF) компани “Цайдам энержи” компанитай нүүрсний уурхайн төсөл болон эрчим хүчний 600 МВт-ын станцын төслийнх нь 80%-ийг авахаар санамж бичиг байгуулжээ. “Guildford Coal” компанийн Монгол дахь охин компани болох “Терра Энержи” нь Өмнөговь аймгийн Ноён суманд “Баруун Ноён уул” коксжих нүүрсний уурхайн төсөл хэрэгжүүлж, экспортоо эхлээд байгаа билээ. Харин энэхүү эрчим хүчний нүүрсний төсөл болон “Цайдамнуур” станцын төслийг хэрэгжүүлж улмаар дотоодын зах зээлд нийлүүлэхээр зорьж буй нь тус компанийн хувьд нэлээд зоримог бөгөөд томоохон алхам болж байна. Guildford компани станцын төслийн хөрөнгө оруулалтыг босгохоор Хятадын томоохон эрчим хүчний компаниудтай хамтарч ажиллах төлөвтэй байна. Энэ талаар эхний шатны яриа хэлэлцээрүүдийг хийж амжжээ.

“Цайдам энержи” компани нь Төв аймгийн Баян суманд Цайдам нуурын уурхайд 600 МВт-ын дулааны цахилгаан станц байгуулах тусгай зөвшөөрөлтэй бөгөөд станцын хэсгээс ердөө км хүрэхгүй зайнд орших гурван ашиглалтын тусгай зөвшөөрөлтэй юм. Иймд нүүрсийг станц руу шууд конвейерээр зөөвөрлөх юм байна. Тусгай зөвшөөрлийн талбайд эрчим хүчний томоохон уурхай орших бөгөөд нийтдээ 630 сая тонн эрчим хүчний нүүрсний нөөцтэй гэж тогтоогоод буй юм.

Энэхүү худалдааны хэлцэлд Guildford өөрийн 60 сая ширхэг нэмэлт шинэ хувьцааг “Цайдам энержи”-д олгохын сацуу өмнө нь буцаан төлөх нөхцөлтэйгээр шилжүүлсэн байсан 2 сая долларыг хэрэгсэхгүй болгож байгаа ажээ.

Guildford-ын тухайд зах зээлийн хүнд нөхцөлд коксжих нүүрсний экспортоо эхлүүлж байсан бол одоо Монголын эрчим хүчний зах зээлд томоохон тоглогч болохоор шийдэмгий алхам хийж буй нь ихээхэн анхаарал татаж байна.

Тус компанийн Ерөнхий захирал Мichael Avery хэлцэл амжилттай болбол хурдацтай хөгжиж буй Монголын дотоодын эрчим хүчний зах зээлд цахилгаан нийлүүлэх боломжийг бүрдүүлэх тухай мэдэгджээ.

Guildford компанийн хувьцаа одоогийн байдлаар бирж дээр 0.039 австрали долларын үнэлгээтэй, харин компанийн нийт зах зээлийн үнэлгээ нь 43.84 сая доллар байна.

Б. Төгс