ММС-ийн хувьцааны үнэ 268% өсөв

Хонконгийн хөрөнгийн биржид бүртгэлтэй Mongolian Mining Corporation-ийн хувьцааны үнэ өнөөдрийн арилжаа хаагдахад 0.14 хонконг доллар болж, 80 орчим хувиар өсөөд байна. Нийт 800 орчим сая ширхэг хувьцаа арилжигдсан нь сүүлийн 1 сарын дунджаас 16 дахин өндөр байгаа юм. Ингэснээр тус компанийн хувьцааны үнэ сүүлийн нэг сард 233 хувиар, сүүлийн 3 сард 270 орчим хувиар тус тус өсөөд байна. Ялангуяа сүүлийн 2 долоо хоногийн хувьцааны үнийн өсөлт нь тус компани зээлдүүлэгч болон бонд эзэмшигчидтэйгээ хийж буй хэлэлцээ амжилттай болж буйг илтгэж байж магадгүй хэмээн шинжээчид үзэж байна.

Нэгдүгээр сард тус компани бонд болон зээлийнхээ бүтцийг өөрчлөх талаар мэдэгдсэнээр хувьцааны үнэ 0.03 хонконг доллар болж, огцом унасан билээ. Мөн 3 дугаар сард компани зээлийн төлбөрөө төлөөгүй, бондын хүүгийн төлбөрөө төлөөгүй. Улмаар 4 дүгээр сард 2017 онд төлөх бондын төлбөрөө ч төлөх боломжгүй болсон хэмээн дефолт зарлаж байгаагаа мэдэгдсэн юм. Компанийн зүгээс бонд эзэмшигчид болон зээлдэгч банкуудтай зээлийн бүтцээ өөрчлөх талаар хэлэлцээ үргэлжилсээр байгаа. ММС-ийн Гүйцэтгэх захирал Г.Батцэнгэл бонд эзэмшигчид болон зээлдэгч банкуудтай тохиролцоонд хүрч чадна гэдэгт итгэлтэй байгаагаа хэд хэдэн удаа мэдэгдсэн билээ.

4 дүгээр сарын 29-нд 93 сая долларын зээлийн үлдэгдэлтэй байгаа BNP Paribas болон ICBC-ийн зүгээс FTI Сonsulting компанийг дундын зөвлөхөөр томилсноо мэдэгдсэн. Дундын зөвлөх нь дээрх хоёр банкийг төлөөлж, ММС болон бонд эзэмшигчидтэй хэлэлцээ хийх юм. Мөн үед тус компанид Хонконгийн хөрөнгийн биржээс биржийн шаардлагыг хангаж байгаа эсэх талаар үнэлгээ хийхээр болсон. Компанийн хувьд үйл ажиллагаа нь тогтвортой явж байгаа болохоор биржийн шаардлагыг хангахуйц байгаа хэмээн шинжээчид үзэж байгаа аж.

С.Болд-Эрдэнэ