Баяжуулах, боловсруулах үйлдвэрүүдийн тоног төхөөрөмжийг гаалийн татвараас чөлөөлнө

Монгол Улсын 2024 оны төсвийн төслийн талаар ил тод мэдээлэх, иргэдийн оролцоог нэмэх, төсөвт тавих хяналтыг сайжруулах зорилгоор Сангийн яамнаас “Иргэдийн төсөв 2024” товхимлыг олон нийтэд хүргэжээ. “Төсвийн тухай мэдлэгээ дээшлүүлэх, төсөв боловсруулах үйл явц дахь өөрсдийн оролцоог нэмэх, цаашлаад төлсөн татварынхаа төгрөг нэг бүрийг хэрхэн зарцуулж байгаад хяналт тавих боломжийг бүрдүүлдгээрээ онцлогтой” хэмээн Сангийн сайд Б.Жавхлан хэллээ.

Эх сурвалж:  "Иргэдийн төсөв-2024, Монгол Улсын нэгдсэн төсвийн төсөл", Сангийн яам 

Ирэх оны төсөвт уул уурхайн салбарын эзлэх хувь хэмжээ, энэ салбарт хэрэгжүүлэх арга хэмжээг товчлон хүргэж байна.

УУЛ УУРХАЙН ГОЛЛОХ БҮТЭЭГДЭХҮҮНИЙ ТӨЛӨВЛӨГӨӨ:

ЗЭСИЙН БАЯЖМАЛ:   Хэмжээ: 1.5 сая тн     Үнэ: 9,000.0 ам.доллар/тн, 

НҮҮРС:  Хэмжээ: 60.0 сая тн    Үнэ: 140.0 ам.доллар/тн, 

АЛТ: Хэмжээ: 20 тн   Үнэ: 1,950 ам.доллар/унц

1. Ирэх 2024 оны төсвийн жилд Алсын хараа 2050 хөгжлийн зорилтод хүрэх “Шинэ сэргэлтийн бодлого”-ын тулгуур бүрэлдэхүүн болох “ХОТ, ХӨДӨӨГИЙН СЭРГЭЛТ”-ийн бодлогыг үе шаттайгаар хэрэгжүүлэхээр төлөвлөжээ.

Энэ хүрээнд эрдэс баялгийн салбарт Боловсруулах, баяжуулах үйлдвэрийг дэмжсэн татварын бодлого цогц арга хэмжээг авч хэрэгжүүлнэ.

1. 2021 оны төсвийн төсөлд “Дотоодын үйлдвэрлэлийн боловсруулалтын түвшинг дээшлүүлэх, нэмүү өртөг шингэсэн бүтээгдэхүүний хэмжээг нэмэгдүүлэхэд татварын бодлогын дэмжлэг үзүүлнэ” гэж тусгажээ.
2. Засгийн газрын шийдвэрээр техник, эдийн засгийн үзүүлэлт бүхий баяжуулах, боловсруулах үйлдвэрүүдийн үндсэн хөрөнгөөр бүртгэгдэх, дотоодын үйлдвэрлэлээс хангах боломжгүй импортын тоног төхөөрөмжийн нэмэгдсэн өртгийн албан татварыг 4 хүртэл жилээр сунгах, хэсэгчлэн төлөх, гаалийн албан татвараас чөлөөлөх  аж.
3. Түүнчлэн уул уурхайн бүтээгдэхүүний биржийн арилжаа, хилийн нэвтрүүлэх хүчин чадлыг нэмэхэд чиглэсэн хэд хэдэн арга хэмжээг авч ажиллах юм байна.

-Уул уурхайн бүтээгдэхүүний биржийн үйл ажиллагаа, хилийн нэвтрүүлэх хүчин  чадлыг нэмэгдүүлэхэд чиглэсэн үйл ажиллагааг үргэлжлүүлэн хэрэгжүүлнэ.

-Уул уурхайн бүтээгдэхүүний биржээр дамжуулан арилжаанд оролцох аж ахуйн нэгжүүдийг нэмэх,

-Ил тод, нээлттэй арилжааг дэмжин, хилийн нэвтрүүлэх хүчин чадлыг сайжруулах хүрээнд төмөр зам, боомтуудын дэд бүтцийг хөгжүүлнэ гэжээ.

5. Ирэх оны төсөвт орлогын өсөлтөд нөлөөлөх хүчин зүйлсийг  4.2 их наяд гэж тооцоод уул уурхайн салбарын өсөлтийн нөлөө 1,0 их наяд төгрөгт хүргэнэ гэж төлөвлөжээ.

Эх сурвалж:  "Иргэдийн төсөв-2024, Монгол Улсын нэгдсэн төсвийн төсөл", Сангийн яам