Эрдсийг эрдэнэст
Ирээдүйг өндөр хөгжилд
Ирээдүйг өндөр хөгжилд
Mining The Resources
Minding the future
Minding the future
Уулзалтад Аж үйлдвэр, Эрдэс баялгийн сайд Цэвэгдоржийн Туваан, сайдын зөвлөх Ж.Ганхуяг, Уул уурхайн бодлогын газрын дарга М.Мэндбаяр, Хүнд үйлдвэрийн бодлогын газрын дарга С.Сүхбат, Гадаад хамтын ажиллагааны хэлтсийн ахлах мэргэжилтэн Б.Батцэцэг, Оюутолгой ХХК-ий талаас Оюутолгой ХХК-ийн Гүйцэтгэх захирал хатагтай Дэйрдрэ Лингенфэлдер, Оюутолгой ХХК-ийн Засгийн газрын харилцаа хариуцсан төлөөлөгч Б.Алтангэрэл, Оюутолгой ХХК-ийн Гадаад харилцааны Ерөнхий зөвлөх Б.Өсөхбаяр нар оролцож Аж үйлдвэр, Эрдэс баялгийн яам, Оюутолгой ХХК-ийн хамтын ажиллагааны талаар санал солилцов.
Оюутолгой ХХК-ийн Гүйцэтгэх захирал хатагтай Дэйрдрэ Лингенфэлдер Аж үйлдвэр, Эрдэс баялгийн сайдаар томилогдсон Цэвэгдоржийн Туваанд баяр хүргэж, амжилт хүсэв. Тэрбээр уулзалтын эхэнд шинээр томилогдсон сайдын ажлын туршлага энэ салбарын хөгжил дэвшилд үнэтэй хувь нэмэр оруулна гэдэгт итгэлтэй байгаагаа илэрхийлэв. Аж үйлдвэр, Эрдэс баялгийн сайд Ц.Туваан Оюутолгой бол дэлхийн хэмжээний орд газар гэдгийг дурдаж Монгол Улсын болон олон улсын хууль, дүрэм журмын хүрээнд дэмжлэг үзүүлэн, оролцогч талуудын хамтын ажиллагаа харилцан ашигтай байх зарчмыг баримтлан ажиллахаа илэрхийлэв.
Тэрбээр, Уул уурхайн баялаг бол хязгаарлагдмал нөөц учир нэмүү өртөг шингээсэн бүтээгдэхүүн болгож аж үйлдвэрийн салбараа хөгжүүлэх хэрэгцээ шаардлага тулгарч байгаа тул яамныхаа нэрд “Аж үйлдвэр” гэх нэр томьёог тусгасан талаар уулзалтын үеэр онцлов. Оюутолгойн гэрээнд дурдагдсан байгаа ойрын хугацааны төлөвлөгөө, стратегийн шийдвэрүүд, бүтээн байгуулалт, үйл ажиллагаатай бүрэн танилцаж, цаашид хэрхэн хамтран ажиллах талаар санал солилцохоо сайдын зүгээс илэрхийлэв. Түүнчлэн цаашид эрчим хүчний хангамжтай холбоотой асуудлаар ярилцах нь цаг үеийн хувьд ач холбогдолтой хэмээв.
Монголын ард түмэн, Монгол Улсын Засгийн газар Оюутолгойн орд газраас ашиг, орлогын өндөр хүлээлттэй байгаа. Оюутолгой ХХК-ийн үйлдвэрийн зардал өсөх тутам монголын талд үлдэх ашиг багасах тул талууд харилцан ашигтай байх зарчмыг баримтлан ажиллахыг онцлон дурдав.
Оюутолгой ХХК-ийн зүгээс үйл ажиллагааныхаа талаар танилцуулж, 2024 онд багтаан гүний уурхайн төслийг дуусгах бөгөөд 2025 оноос бүрэн хүчин чадлаараа ажиллах боломжтой болно гэв. Ингэснээр өмнөх жилүүдийн дунджаас илүү хэмжээний хүдрийг баяжуулах боломж бүрдэж буй талаар дурдав.
Уусмалын баяжуулах үйлдвэрийн бүтээн байгуулалт эрчимтэй явагдаж байгааг онцлон цаашид Оюутолгойн төслийн ажлыг илүү түргэн шуурхай явуулж, хамтран ажиллана гэдэгт итгэж байна хэмээв.