Оюу толгой компани 46,884 унц баяжмал дахь алт үйлдвэрлэжээ

Т.Бямбанаран, П.Жаргалсүрэн

Оюу толгой компани 2024 оны II улирлын байдлаар 52,531 тонн баяжмал дахь зэс, 46,884 унц баяжмал дахь алт үйлдвэрлэжээ. Тус компани 2024 оны II улирлын гүйцэтгэлийн тайлангийн хурлаа өнөөдөр компанийн төв оффистоо хийлээ.

Энэ үеэр гүйцэтгэх захирал Дэйрдрэ Лингенфэлдер Оюу толгой компанийн шинэчилсэн стратегийн талаар танилцуулж, тайлант хугацаанд гаргасан онцлох амжилтуудыг дурдав.

Тус компани шинэчилсэн стратегийнхаа хүрээнд “Хамт олон, хамтын ажиллагаа, хөрст дэлхий, хүртэх өгөөж” гэсэн дөрвөн үндсэн тэргүүлэх чиглэлээр үйл ажиллагаа явуулж байгаа аж.

Хамт олон тэргүүлэх чиглэлийн хүрээнд энэ хугацаанд гэмтэл, бэртлийн давтамжийн үзүүлэлт 200,000 хүн/цаг тутамд 0.12 ноогдож “Рио Тинто” группийн хэмжээнд аюулгүй ажиллагааг сайн хангасан уурхай болсон байна. Нийт 148,629 хүн/цагийн сургалтад ажилтнуудаа хамруулан ур чадварыг сайжруулжээ. Хамтын ажиллагааны хувьд 2024 оны II улирлын байдлаар орон нутгийн тогтвортой хөгжилд чиглэсэн төслүүдэд 26.3 тэрбум төгрөг зарцуулсан бол 306 тэрбум төгрөгийг татвар хураамж, бусад төлбөрт төлсөн тухайгаа тайлагналаа. Хөрст дэлхий тэргүүлэх чиглэлийн хүрээнд тайлант хугацаанд ус дахин ашиглалтын зорилт 80 хувь байсан бөгөөд зорилтоо давуулан биелүүлж, дунджаар 88.5%-д хүргэжээ. Хүртэх өгөөжийн хувьд 52,531 тонн баяжмал дахь зэс, 46,884 унц баяжмал дахь алт үйлдвэрлэжээ.

Компанийн тайлант хугацаанд гаргасан онцлох амжилтуудыг дурдвал:

• Улаанбаатар, Эрдэнэт, Дархан хотуудын их, дээд сургуулиудад нийт найман удаагийн "ОТ on the Go!" арга хэмжээг амжилттай зохион байгуулж, оюутан залууст ирээдүйн чиг баримжаа олгох мэргэжилтнүүдийн илтгэлүүд, Оюу толгой компаниас хэрэгжүүлдэг боловсролын хөтөлбөрүүдийн талаарх мэдээллийг хүргэсэн.
• Дархан-Уул аймгийн Хонгор сумын Хургадын ам, Шарын гол сумын Хар Ямаатын аманд хариуцлагагүй уул уурхайн үйл ажиллагааны улмаас эвдэрсэн 91.6 га газарт техникийн нөхөн сэргээлтийг хийж дуусгасан .
• Малчдад зудын гамшиг, хүндрэлийг даван туулахад туслах Монголын Уул Уурхайн Үндэсний Ассоциациас хэрэгжүүлж буй "Бид Хамтдаа" аянд "Оюу толгой" компани нэгдэн, мал сүргийнхээ 70-аас дээш хувийг зудад алдсан 3,333 малчин өрхөд нийт нэг тэрбум төгрөгийн дэмжлэг үзүүлсэн.
• Мод үржүүлгийн газруудын хүчин чадлыг сайжруулах, нөхөн сэргээлтийг дэмжих зорилгоор Засгийн газрын хэрэгжүүлэгч агентлаг Ойн газарт 1.5 тэрбум төгрөгийн үнэ бүхий тоног төхөөрөмжүүдийг хүлээлгэн өгсөн.
• Шинжлэх Ухаан Технологийн Их Сургууль, Рио Тинто групп, "Оюу толгой" компани хамтран Монгол Улсад анх удаа геотехникийн инженерүүдийг дотооддоо бэлтгэж, анхны төгсөгчид бакалаврын дипломоо гардан авсан.
• Оюу толгой компани Unread медиа компанитай хамтран энэ оны хоёрдугаар сард эхлүүлсэн "Байгаль орчны сайн туршлага хуваалцах хөтөлбөр"-өө амжилттай дуусгасан.
• Ханбогд сумын гэр хорооллын цэвэр бохир усны шугамын ажлыг хийж дуусгасан.