Камала Харрис АНУ-ын чухал ашигт малтмалын нөөц бий болгоно гэж амлалаа

Ч. Сансар 

Дэд ерөнхийлөгч Камала Харрис үндэсний хэмжээнд чухал ашигт малтмалын (критикал минерал) нөөц бүрдүүлэхээ амлалаа.

Батарейгаас эхлээд батлан ​​хамгаалах систем зэрэг бүх зүйлд ашигладаг критикал минералын нөөц байгуулах нь эдийн засаг, үндэсний аюулгүй байдалд чухал үүрэг гүйцэтгэнэ гэж мэдэгдлээ.

Камала Харрисын энэхүү амлалт нь сонгуулийн мөрийн хөтөлбөрт орсон 100 тэрбум доллар бүхий аж үйлдвэрийн бодлогын нэг хэсэг юм. Мөн АНУ-ын дэд ерөнхийлөгч хүйтэн дайны үед баталсан Батлан ​​хамгаалах үйлдвэрлэлийн тухай хуулийн хүрээнд засгийн газрын онцгой эрх мэдлийг ашиглаж, шинэ урамшуулал олгох замаар критикал минералын дотоодын үйлдвэрлэлийг нэмэгдүүлэхийг уриалжээ.

“Дотоодын үйлдвэрлэлийг нэмэгдүүлэхийн зэрэгцээ бид холбоотнууд болон түншүүдтэйгээ хамтран критикал минералын нийлүүлэлтийн сүлжээг бэхжүүлэхийн тулд шинэлэг алхмуудыг хийх болно." гэж Харрисын сонгуулийн ажлын мэдэгдэлд дурджээ.

Критикал минерал нь эдийн засагт зайлшгүй шаардлагатай бөгөөд нийлүүлэлт тасрах эрсдэлтэй гэж үздэг. 12-р сард АНУ болон Хятадын Коммунист намын стратегийн өрсөлдөөний асуудлыг зохицуулах Төлөөлөгчдийн танхимын Сонгон шалгаруулах хорооноос "Америкийн үйлдвэрлэгчдийг үнийн хэлбэлзлээс хамгаалах", Хятад улс “критикал минералын  салбар дахь ноёрхлоо хяналтын хэрэгсэл болгон ашиглахаас хамгаалах” зорилгоор критикал минералын нөөцийг бий болгохыг зөвлөжээ.

Тус хорооноос АНУ-ын Батлан ​​хамгаалах яамны удирддаг критикал минералын Үндэсний нөөцийг өргөжүүлэхэд нэг тэрбум доллар зарцуулахыг зөвлөжээ.

Эх сурвалж: mining.com