“ГОВЬГЕО” ХХК ОЛОН УЛСЫН ШАГНАЛ ХҮРТЖЭЭ

Өрөмдлөгийн чиглэлээр үйл ажиллагаа явуулдаг үндэсний томоохон компаниудын нэг “Говьгео” ХХК олон улсад нэр хүндтэй “The Golden award for quality and business prestige” шагналыг Монголоос анх удаа  хүртжээ. Дэлхийн 51 орны уул уурхайн салбарын төлөөлөгчид оролцсон шагнал гардуулах ёслолын ажиллагаа ХБНГУ-ын Берлин хотноо болсон байна.

“Other Ways International Research and Consultants” байгууллагын   тэргүүн  Чарбел Табет     “Говьгео” компанийн гүйцэтгэх захирал Ц.Нэмэхбаатарт шагналын цом, өргөмжлөлийг гардуулжээ.

Эдийн засгийн салбар нь хурдтай хөгжиж байгаа Вьетнам, Камбож, Энэтхэг зэрэг орны  хувийн хэвшлийнхний дунд  санал асуулга явуулснаар энэхүү нэр хүндтэй шагналын эзнийг тодруулсан хэмээн  “Говьгео” компанийн гүйцэтгэх захирал  ярьлаа.  
 
Францын цөмийн эрчим хүчний “Арева” группийн Монгол дахь түнш “Говьгео” компани   2008 онд олон улсын BID байгууллагын чанарын  ”Gold”, 2009 онд олон улсын BID байгууллагын чанарын  “Platinum” шагналыг тус тус хүртэж байсан юм.

Г.Идэр