ОЛОН УЛСЫН ТОМООХОН БИРЖҮҮД МОНГОЛД ЦУГЛАРНА

    Монголын компаниуд олон улсын зах зээлээс хөрөнгө босгох сонирхолтой байгаа энэ үед “Фронтиер Секьюритис” компаниас “Олон улсын зах зээл дээр хөрөнгө босгох нь” ээлжит хөрөнгө оруулалтын бага хурлаа зохион байгуулах гэж байна. Зургадугаар сарын 6-10-ны өдрүүдэд Монголын Хүүхдийн ордонд болох энэхүү бага хурал Монголын компаниуд төдийгүй Монголд хөрөнгө оруулах сонирхолтой хөрөнгө оруулагч нарт зориулагдаж байгаа юм.

      Энэ жилийн бага хурал нь Монголын компаниуд хувьцаа гаргах, Монгол улсын Засгийн газар өмч хувьчлал ба бонд гаргах замаар дотоод гадаадын зах зээл дээр хөрөнгө босгох, Монголын хөрөнгө оруулалтын орчны талаар мэдээлэл өгөх, уул уурхай болон бусад салбаруудад хөрөнгө оруулах боломжуудыг гадаад, дотоодын хөрөнгө оруулагч нарт танилцуулах зэрэг асуудал дээр төвлөрөх юм байна.

     Бага хуралд Солонгос, Хонконг, Австрали, Германы болон Токиогийн Эй Эм хөрөнгийн бирж оролцож байгаагаараа онцлог юм. Монголын компаниудад Азийн санхүүгийн гол төвүүд болон Европын зах зээлээс хэрхэн хөрөнгө босгох арга замыг танилцуулахаар дээрх биржүүд оролцож байгаа аж. Мөн гадаадын томоохон хөрөнгө оруулалтын банкууд болон хөрөнгө оруулагч BOCI International, CICC, Citigroup, J.P. Morgan, Quam Asset Management, American Appraisal, Hogan Lowells, Moody’s Investors Service, CRU International зэрэг нэр нөлөө бүхий мэргэжлийн байгууллагууд оролцох юм.

     Мөн энэхүү хуралд ТӨХ-ны дарга Д.Сугар, Үндэсний хөгжил, шинэчтгэлийн хорооны дарга Ч.Хашчулуун, УИХ-ын гишүүн Д.Ганхуяаг, “Эрдэнэс Монгол” компанийн Гүйцэтгэх захирал Д.Энэбиш нар илтгэл тавих юм байна.

     Бага хурлыг зохион байгуулагчид “Бидний зохион байгуулж буй хурал шаардлагатай мэдээлэл, бизнесийн холбоо тогтоох орчноор хангаж, шийдвэр гаргах түвшинд бодитой хувь нэмэр оруулна гэдэгт итгэл төгс байна. Иймд хуралд өргөнөөр оролцоно гэдэгт найдаж байна. Хамгийн гол нь хурал үнэ төлбөргүй. Хэрэв та хуралд оролцогсодтой илүү ойртон танилцаж, бизнесийн холбоо тогтоохыг хүсвэл хурлын өдрүүдэд зохион байгуулагдах өдөр, оройн хоол болон бизнес турт оролцох боломжтой “Smart” багцыг сонгоорой” хэмээн зөвлөж байна.

    Бага хурлын талаарх дэлгэрэнгүй мэдээллийг дараах хаягаар авна уу.

Вэбсайт:  http://www.frontier-annual-conference.com/
Имэйл: staff@frontier.mn
Утас:  70119999