Хятад өнгөт металын олборлолтоо 8 хувиар нэмэгдүүлнэ

Хятад улс өнгөт металын олборлолтоо 2015 он гэхэд 46 сая тоннд хүргэхээр төлөвлөж байгаа тухай тус улсын Аж үйлдвэр, мэдээллийн технологийн яамнаас мэдэгджээ. Өнгөрсөн жил тус улс 34.3 сая тонн өнгөт метал олборлосон байна. Өнгөт металын үйлдвэрлэлээ тэлэх зорилтоо биелүүлэхийн тулд олборлолтын хэмжээгээ жил бүр 8 хувиар нэмэгдүүлэх шаардлагатай байгаа юм. Өнгөт металын бүрэлдэхүүнд зэс, хөнгөн цагаан, хар тугалга, цайр, никель, магни, титан, цагаан тугалга, антимони, мөнгөн ус зэрэг нь ордог. Хятадын зэсийн олборлолт 2011-2015 оны хооронд жилд дунджаар 7.3 хувиар өсөх тооцоотой байгаа бөгөөд хугацааны сүүлээр тус улсын зэсийн үйлдвэрлэл 6.5 сая тоннд хүрэх ажээ.

Харин Хятадын зэсийн эрэлт хэрэгцээ энэ хугацаанд жилд дунджаар 5.2 хувиар өсөх төлөвтэй байгаа юм. Урьдчилсан таамгаар тус улсын зэсийн хэрэглээ 2015 онд 9.7 сая тоннд хүрэх ажээ. Мөн 2015 он гэхэд хөнгөн цагаан үйлдвэрлэлийн хэмжээгээ 24 сая тоннд хүргэхээр зорьж байна. Энэ үед Хятад улс уг металын дотоодын эрэлтээ бүрэн хангах боломжтой болох юм.

Бусад өнгөт металын тухайд 2015 онд цайрын үйлдвэрлэлийг 5.5 сая тонн, хар тугалгынхыг 7.2 сая тоннд хүргэж, нэмэгдүүлэхээр төлөвлөжээ. Энэхүү үйлдвэрлэлийн өргөтгөлийн үр дүнд Хятад улс цайр, хар тугалгын дотоодын эрэлтийнхээ 70-80 хувийг хангах юм байна.

Хятад улс одоогоор зэсийн хэрэгцээнийхээ 80 гаруй хувийг импортоор хангаж байгаа юм. Тус улсын энэхүү өнгөт металын олборлолтыг эрчимтэйгээр нэмэгдүүлэх алхамыг дотоодын эх үүсвэрт түшиглэж хөгжих бодлогын хүрээнд хийж буй ажил гэж шинжээчид тайлбарлаж байна.

Б.Төгс