Мэдээ

Нью-Йоркийн хөрөнгийн биржийг ICE худалдаж авлаа

2012-12-21

Байгуулагдаад арав гаруйхан жил болж буй ICE буюу Intercontinental Exchange 1792 оноос эхлэн АНУ-ын капитализмын үндсийг тавьсан Нью-Йоркийн хөрөнгийн биржийг (NYSE) худалдаж авахаар боллоо. Хоёр биржийн ТУЗ-ийн гишүүд бүгд дуу нэгтэйгээр худалдааны хэлцлийг зөвшөөрчээ. ICE нь NYSE биржийг нэгж хувьцаа бүрийг нь 33.12 ам.доллараар үнэлж, нийтдээ 8.2 тэрбум ам.доллараар худалдан авахаар тохиролцжээ. Худалдааны гуравны нэг хувийг бэлэн мөнгөөр, үлдсэнийг хувьцаа хэлбэрээр төлөх юм байна. Нью-Йоркийн биржийг эзэмшдэг NYSE Euronext компанийг худалдаж авах үнэлгээ нь тус компанийн өнгөрсөн лхагва гариг дахь хувьцааны хаалтын ханшаас 37 хувиар дээгүүр үнэлгээ юм.

NYSE нь зургаан жилийн өмнө Euronext хөрөнгийн захыг өөртөө нэгтгэн хамгийн том хөрөнгийн бирж болж чаджээ. Одоогоор NYSE-д бүртгүүлээд буй компаниудын зах зээлийн үнэлгээ нийтдээ 14 их наяд ам.доллар даваад байна. Нью-Йоркийн бирж нь хөдөө аж ахуй, уул уурхай, эрчим хүч, аж үйлдвэр, санхүүгийн байгууллага гэх мэт бүхий л салбарын байгууллагын хувьцааны арилжаа болон гадаад валют, төрөл бүрийн зээлийн хэрэгслийн худалдааг хамардаг юм.

Б.Төгс

СЭДЭВ

Ашигт малтмал

Эрдэс

Стратегийн орд

Дэд бүтэц

Судалгаа