Уул уурхай

“Эрдэнэс Тавантолгой”-гоос гэрээгээ мөрдөхийг шаардав

2013-01-24

Хятадын төрийн өмчит “Чалко” компани “Эрдэнэс Тавантолгой”-г нүүрсний нийлүүлэлтээ хэвээр үргэлжлүүлэхийг шаардсан тухай Блүмбэрг мэдээллээ. “Чалко” компанийн хувьд 250 сая ам.долларын нийлүүлэлтийн гэрээгээ хүндэтгэж ажиллахыг хүсч буйгаа онцолжээ. Харин “Эрдэнэс Тавантолгой”-н хувьд нүүрсний борлуулалтаас тонн тутамдаа 8 ам.долларын алдагдал хүлээж буй тул экспортоо зогсоохоос өөр аргагүй болжээ. Өөрөөр хэлбэл, тус компани нэг тонн нүүрсээ 53 ам.доллараар борлуулж буй ч олборлолт, тээвэрлэлтийн өртөг 61 ам.доллар/тонн болж буй юм.

Өнгөрсөн арваннэгдүгээр сард “Чалко”, “Эрдэнэс Тавантолгой”-н төлөөлөл гэрээний нөхцөлийг өөрчлөх талаар уулзалт хийсэн ч амжилтгүй болжээ. “Чалко”-гийн мэдэгдэж буйгаар, гэрээний үндсэн нөхцөлийг өөрчлөх нь зүйд нийцэхгүй. Гэрээгээ хүндэтгэж, ялангуяа нууцлалын нөхцөлийг чанд мөрдөж ажиллана гэдэгт найдаж буйгаа илэрхийлжээ. “Эрдэнэс Тавантолгой”-н хувьд нүүрсний ложистикийн компани болох “Алтанговь”-д төлөх төлбөрөө өгч чадаагүйн улмаас энэ сарын 11-нд экспортоо зогсоосноо зарласан. Монголын нүүрсний төрийн өмчийн компанийн бүтээгдэхүүний үнээ нэмэгдүүлж, нийлүүлэлтээ бууруулах гэсэн шинэ төлөвлөгөө нь биелэх найдвар “Чалко”-гийн мэдэгдлээр замхрах хандлагатай боллоо. Уг нь 2011 оны долдугаар сарын сүүлээр “Чалко”-той нүүрс нийлүүлэлтийн 5 жилийн хугацаатай гэрээ байгуулж байхдаа “Эрдэнэс Тавантолгой” урьдчилж авсан санхүүжилтээ 1-1.5 жилийн хугацаанд төлж барагдуулна гэж хэвлэлийнхэнд мэдээлж байсан юм. Гэвч өнөөдрийн байдлаар төрийн өмчийн “Эрдэнэс Тавантолгой”-н санхүүгийн байдал хараат бус болох нь битгий хэл тун хүндхэн байдалд оржээ.

Б.Төгс

СЭДЭВ

Ашигт малтмал

Эрдэс

Стратегийн орд

Дэд бүтэц

Судалгаа