“Би уурхайчин” уралдааны эхний бүтээлүүд ирж байна

Геологи, уул уурхайн үйлдвэрлэлийн үе шат болгонд гар бие оролцож яваа хөдөлмөрч хамт олны сэтгэлийн толь болсон түүхэн агшнуудыг MMJ тэмдэглэн үлдээхийг зорьж байна. Мэргэжлийн гэрэл зурагчид Шүүгчээр нь ажиллах уг уралдаанд геологич, уурхайчдын өөрсдийнх нь бүтээлийг хүлээн авч буйгаараа онцлог.

Уралдааныг Уул уурхайн яам, The Mongolian Mining Journal, “Гамма” гэрэл зургийн агентлаг хамтран зохион байгуулж буй бөгөөд 2013 оны аравдугаар сарын 15-ныг дуустал уран бүтээл хүлээн авна.

Ирүүлсэн бүтээлүүдээр “Би уурхайчин” үзэсгэлэн гаргаж, олон нийтэд дэлгэн сонирхуулах бөгөөд  Шилдэг агшнуудыг үзэсгэлэнгийн  үеэр шалгаруулж, шагнал гардуулах юм.

Мөн “Би уурхайчин” гэрэл зургийн сонирхогчдын уралдаанд байгууллага, хамт олноо идэвхтэй оролцуулсан уурхай, компанийн удирдлагуудаас ярилцлага авч, олон нийтийн мэдээллийн хэрэгслэлээр үйл ажиллагааг нь танилцуулна.

Гэрэл зургийн уралдааны эхний бүтээлүүдийг  The Mongolian Mining Journal болон “Гамма” агентлаг хүлээн авч эхлээд  байна.  Монголын геологи, уул уурхайн ажил амьдралын онцлог, эгэл ажилчин, албан хаагчдын харах өнцөг шингэсэн олон сонирхолтой гэрэл зураг уралдаанд ирээд байна. Тэдгээрийн дунд уурхайн нэг өдрийн тухай өгүүлсэн фото сурвалжлага анхаарал татаж байгааг тэмдэглэе.

Уралдаанд оролцогчдод тавигдах шаардлага, шагнал, холбогдох хаяг зэрэг дэлгэрэнгүй мэдээллийг http://www.mongolianminingjournal.com сайтаас, мөн info@mongolianminingjournal.com, ider@mongolianminingjournal.com хаягаар тодруулга авч болно.