ОХУ-ын газрын тосны экспортын татвар нэмэгдэнэ

Ирэх 6 дугаар сарын 1-нээс Оросын газрын тосны бүтээгдэхүүний экспортын татвар 8,9 ам.доллараар нэмэгдэх аж. Тус улсын Сангийн яамны мониторингийн мэдээллээр 4 дүгээр сарын 15-наас 5 дугаар сарын 14-ны хооронд дэлхийн зах зээл дээр Urals маркийн газрын тосны нэг баррелийн үнэ 107,6 ам.доллар байсан байна. Тиймээс ОХУ-ын газрын тосны бүтээгдэхүүний “55-60-90” татварын шинэ системийн дагуу ирэх сараас экспортын татвар тонн тутамд 2,4%-иар нэмэгдэж, 385 ам.доллар болох юм. Монгол улсын импортын гол бүтээгдэхүүн бензиний экспортын татвар одоогийн 338,4 ам.доллараас нэмэгдэж 346,5 ам.доллар болно. ОХУ-ын Эдийн засаг, хөгжлийн яамнаас гаргасан таамаглалаар газрын тосны олборлолт 2014 онд 524,8 сая тонн, 2015 онд 524 сая тонн, 2016 онд 522 сая тонн, 2017 онд 520 сая тонн болж буурах гэнэ. 

сар	Тонн тутамд	Үнэ/1 тонн/
1 дүгээр сар	+9,1 ам.доллар	360,9 ам.доллар
2 дугаар сар	-19,3 ам.доллар	347,6 ам.доллар
3 дугаар сар	-1,7 ам.доллар	345,9 ам.доллар
4 дүгээр сар	+2,4 ам.доллар	348,3 ам.доллар
5 дугаар сар	-10,9 ам.доллар	338,4 ам.доллар
6 дугаар сар	+8,9 ам.доллар	346,5 ам.доллар

Э.Од