Зэсийн экспорт 1.9 тэрбум доллар болжээ

Үндэсний статистикийн хорооноос гаргасан мэдээгээр энэ оны эхний 10 сарын байдлаар Монгол улсын гадаад худалдаа 9 тэрбум 80 сая ам.долларт хүрч, гадаад худалдааны тэнцэл 131.4 сая ам.долларын ашигтай гарчээ. 10 дугаар сард гадаад худалдааны тэнцэл 155.8 сая долларын ашигтай гарсан нь гол нөлөөг үзүүлсэн байна. Эхний 10 сард экспорт өмнөх оны мөн үеэс 32.3% өсч, 4 тэрбум 605 сая доллар болсон бол импорт 16.2% буурч 4 тэрбум 473 сая доллар болжээ.

Зэсийн баяжмалын экспортын биет хэмжээ өмнөх оны мөн үеэс 2.1 дахин өсч 1095.1 мянган тонн болсон бол экспортын орлого 2.6 дахин өсч, 1 тэрбум 932.5 сая ам.доллар болсон байна. Зэсийн баяжмалын экспортын орлого 1 тэрбум 183.2 сая доллараар өссөн гэсэн үг юм. Ингэснээр зэсийн баяжмалын экспорт нийт экспортын 41%-ийг дангаараа бүрдүүлж байна.

Чулуун нүүрсний экспортын биет хэмжээ 1.4 сая тонноор нэмэгдэж, 14.8 сая тонн болсон ч экспортын орлого 197 орчим сая доллараар буурч, 683.9 сая орчим ам.доллар болсон байна. Нүүрсний экспорт нийт экспортын 14%-ийг бүрдүүлж байна. Түүхий газрын тосны экспорт 42.8%-иар нэмэгдэж, 5.7 сая баррель болжээ. Борлуулалтын орлого нь 158.8 сая доллар буюу 40%-иар нэмэгдэж, 554.8 сая доллар болсон байна. Газрын тосны экспорт нийт экспортын 12%-ийг бүрдүүлжээ.

Харин төмрийн хүдрийн экспортын орлого буурсаар байна. Эхний 10 сард 5 сая тонн төмрийн хүдэр экспортолсон нь өмнөх оны мөн үеэс 0.5 сая тонноор бага юм. Экспортын орлого 179.7 сая доллар буюу 33%-иар буурч, 366.8 сая доллар болжээ. Алтны экспортын орлого 324 сая доллар болж, 9.4%-ар өссөн байна. Нийт 7.9 тонн алт экспортолсон нь өмнөх оны мөн үеэс 0.7 тонноор илүү байгаа юм.

С.Болд-Эрдэнэ