CRU: Зэсийн зах зээл сайжрахгүй

Оны эхний сард 2009 оноос хойших хугацаан дахь хамгийн доод үнэ буюу 5500 ам.доллараас доош үнэд хүрээд байсан хүрэн металын ханш 6000 ам.долларыг давж 6230 ам.доллар болтлоо өсөөд байсан билээ. Гэвч өчигдрийн байдлаар зэсийн гурван сарын гэрээт үнэ Лондоны металын бирж дээр 5915 ам.доллар болж буурлаа. Энэ долоо хоногт тус бирж дээр зэсийн үнэ 100 гаруй ам.доллараар ийнхүү унаад байна.

Өнгөрсөн мягмар гаригт болсон CRU Copper Conference-ийн үеэр зах зээл судалгааны байгууллага CRU-ийн шинжээч Ванесса Дэвидсон зах зээлийн хамгийн таагүй үе өнгөрсөн ч үнийн өсөлт тийм ч түргэн ирэхгүйг анхааруулжээ. Хуралд оролцсон төлөөлөгчид ч ирэх хэдэн жилийн төлөв сайнгүй байх тухайд санал нэгджээ. CRU-ийн хувьд 2018 онд нийлүүлэлт эрэлтээсээ 300 мянган тонноор хомсдож мэдэх үе хүртэл үнэ 7000 ам.долларын түвшинд хүрч өсөхгүй гэж үзэж байна. Хэдийгээр төслийг хойшлуулах, үйлдвэрлэлийн таналт зэргээс үүдэн 1.5 сая тоннын үйлдвэрлэл танагдахаар байгаа ч энэ нь зах зээлд 2019 онд л мэдэгдэх боломжтой ажээ. Энэ онд Хятадын зэсийн эрэлтийн өсөлт 4%-тай байх төлөвтэйг CRU, Barclays онцлов. Тус улсын эдийн засгийн өсөлт саарч буйн сацуу барилгын салбарын явц удааширсан нь үүнд голлон нөлөөлөхөөр байна. Гэхдээ АНУ, Энэтхэг зэрэг орны эрэлтийн өсөлт зах зээлд эерэг дохио болж өгч буй юм.

“Ройтерс”-ын зэсийн судалгааны тайланд дурдсанаар энэ онд зэсийн нийлүүлэлтийн илүүдэл 399 мянган тонн байхаар байгаа нь өнгөрсөн оны үзүүлэлтээс давсан тоо юм. Энэ жил нэг тонн зэсийн дундаж үнэ өнгөрсөн оныхтой харьцуулахад 12%-иар бага буюу 5975 ам.доллар байх таамгийг тэд дэвшүүлжээ.

Энэ жил дэлхийн зэсийн эрэлт 3%-иар өсч, 22.2 сая тоннд хүрэхээр байна. 

Б.Төгс