Куинслэндийн нүүрсний экспорт дээд амжилт тогтооно

Австралийн Куинслэндийн байгалийн нөөцийн зөвлөлийн Гүйцэтгэх захирал Майкл Роче тавдугаар сарын сүүлийн байдлаар нүүрсний экспорт 200 сая тоннд хүрсэн бөгөөд 2014-2015 оны санхүүгийн жилийн эцсээр (6 дугаар сарын эцсээр) нүүрсний экспорт 220 сая тоннд хүрнэ гэж таамаглаж байна. Үүнд эрчим хүчний нүүрс болон коксжих нүүрсний экспорт багтаж буй юм.

Хятад, Япон, Энэтхэг, Өмнөд Солонгос зэрэг улсын өсөн нэмэгдэж буй хэрэглээ нь Австралийн Bowen Basin сав газрын ордуудаас олборлосон коксжих нүүрсний экспортыг нэмэгдүүлж, улмаар Куинслэнд мужийн нүүрсний нийт экспорт өсөхөд нөлөөлжээ. Энэ санхүүгийн жилд экспортын хэмжээ өнгөрсөн оны үзүүлэлт болох 209 сая тонноос даруй 5%-иар дээшлэн, шинэ амжилт тогтоохоор байна хэмээн Роче ярьжээ.

Дунд хугацаанд Куинслэндийн экспортын хэмжээ Энэтхэгийн эрчим хүчний нүүрсний эрэлтийн улмаас цаашдаа ч нэмэгдэнэ тооцож байна.

Австралийн Засгийн газрын судалгааны нэгжийн тайланд дурдсанаар Энэтхэгийн эрчим хүчний нүүрсний эрэлт нэмэгдэх ба мөн тус улсын барилгын салбарын өсч буй хэрэглээг дагаад коксжих нүүрсний эрэлт нь ч дагаад өсөх төлөвтэй байна.

Энэтхэгийн Эрчим хүч, нүүрс, шинэ болон сэргээгдэх эрчим хүчний сайд Шри Пиюш Гоял саяхан хийсэн мэдэгдэлдээ тус улсын эрчим хүчний гол тулгуур нь нүүрс байх болно гэж хэлжээ.

2017 оноос Энэтхэгийн шинэ эрчим хүчний төслүүдэд үнслэг багатай сайн чанарын нүүрсийг шаардахаар болж буй. Одоогийн байдлаар Энэтхэгийн дотоодын станцуудад ихэвчлэн үнслэг ихтэй, чанар муутай нүүрс хэрэглэдэг байна.   

Б. Төгс