Зэсийн үнэ 5400 долларт хүрч өсөв

Аж үйлдвэрийн гол метал зэсийн үнэ Лондоны металын бирж дээр өчигдөр нэг тонн нь 5400 ам.доллар болж, сүүлийн сар хагас дахь дээд үнэд хүрч өсөв. Үнэ өссөн нь зах зээл дэх нийлүүлэлт буурах төлөвтэй байгаагаас гадна Хятадын зэсийн импорт харьцангуй сайн үзүүлэлттэй гарсан нь нөлөөлжээ. Зэсийн салбарын гол тоглогчдын нэг болсон Glencore компани зах зээлийн нөхцөл байдалтай уялдуулан Африк дахь хоёр уурхайнхаа үйл ажиллагааг түр хугацаанд цуцалсан нь ойрын жил хагасын хугацаанд 400 мянган тонны нийлүүлэлтийг зэсийн зах зээлээс татаж буйтай адил хэмээн шинжээчид тайлбарлаж байна. Үүнээс гадна Freeport компани Индонез дэх зэсийн баяжмалын борлуулалтаа бууруулахаар төлөвлөжээ.

Нөгөөтэйгүүр дэлхийн зэсийн эрэлтийн 40 гаруй хувийг дангаар эзэлж буй Хятадын цэвэр зэс бүтээгдэхүүний импорт 8 дугаар сард 350 мянган тонн байсан нь өмнөх оны мөн үеэс 2.9%-иар илүү байсан төдийгүй зэсийн баяжмалын импорт нь мөн сард өмнөх оноос 20%-иар илүү гарсан нь хөрөнгө оруулагчдад эрэлт нэмэгдэх эерэг ойлголт төрүүлэх нөхцөл болжээ. Түүнчлэн АНУ, Европын эдийн засгийн үзүүлэлт харьцангуй сайн байгаа нь зэсийн зах зээлийн өсөлтөд сайнаар нөлөөлжээ.

Өнгөрсөн сарын сүүлээр зэсийн үнэ нэг тонн нь 4855 тонн болсон нь сүүлийн 6 жилийн хамгийн доод үнэ болоод байсан. Улмаар зэсийн зах зээл уналтад орлоо гэсэн “түгшүүрийн дохио”-г хангинуулсан юм. Гэхдээ энэ долоо хоногийн үнийн өсөлт тогтвортой хадгалагдах эсэх нь тийм ч тодорхой биш байна. 

Б.Төгс