Ертөнц

Хятадын гадаад худалдааны ашиг өссөн ч, нийт эргэлт буурав

2016-01-13

Хятад улсын Гаалийн ерөнхий газар тус улсын гадаад худалдааны ашиг өмнөх онд 2014 оныхтой харьцуулахад 56.7%-иар нэмэгдэж 3.96 их наяд юаньд хүрсэн тухай мэдэгджээ. Зөвхөн өнгөрсөн 12 дугаар сард гэхэд Хятадын гадаад худалдаа 382 тэрбум юанийн ашигтай гарч, өмнөх 11 дүгээр сарынхаасаа 24.7%-иар нэмэгдсэн дүнтэй гарчээ. Өнгөрсөн сард тус улсын экспорт 2.3%-иар өсч 1.43 их наяд юань болсноор Хятадын эдийн засгийн хувьд эерэг дохио болж байна гэж зарим шинжээч тайлбарлаж байна. Харин импорт нь өмнөх сард 4%-иар буурч 1.05 их наяд юаньд хүрчээ.

Гэсэн ч Хятадын гадаад худалдааны нийт эргэлт өнгөрсөн онд өмнөх 2014 оныхоосоо 7%-иар буурч 24.6 их наяд юань байв. Үүнд экспорт 2015 онд 14.14 их наяд (2.15 их наяд ам.доллар) байсан нь өмнөх оныхоосоо 1.8%-иар, импорт 10.45 их наяд юань (1.58 их наяд ам.доллар) байсан нь өмнөх оноос 13.2%-иар танагджээ.

Гаалийн ерөнхий газрынх нь мэдээлж буйгаар тус улсын экспорт, импортын хэмжээ 2015 онд ийнхүү аль аль нь буурсан нь дэлхий даяар эдийн засгийн өсөлт саарсантай холбоотой ажээ. Импортын огцом бууралтад түүхий эдийн ханш хямдарсан болон эрэлт багассан явдал голлон нөлөөлжээ.

Б.Төгс

СЭДЭВ

Ашигт малтмал

Эрдэс

Стратегийн орд

Дэд бүтэц

Судалгаа