Зэсийн ханш буурч эхлэв

Шинэ оны эхэнд Лондоны металын бирж дээр аж үйлдвэрийн гол метал болох зэсийн ханш 6000 ам.доллар/тонн-оос доош буурсан байдалтай байна. Үүнд шинжээчид Хятадын эдийн засгийн өсөлт саарч, түүхий эдийн эрэлт нь буурч болзошгүй гэсэн мэдээлэл гол нөлөөлсөн гэж тайлбарлалаа.

Өчигдрийн байдлаар Лондоны металын бирж дээр нэг тонн цэвэр зэсийн шууд худалдааны үнэ 5839 ам.доллартайгоор хаагджээ. Энэ нь өмнөх оны есдүгээр сарын эхэн үеэс хойших хамгийн доогуур үнэ болж байна. Лондоны металын биржийн агуулах дахь зэсийн нөөц өчигдрийн байдлаар 132 мянган тонн байсан нь нөөц харьцангуй бага байгааг харуулж байна.

Өнгөрсөн оны хэмжээнд зэсийн ханш үндсэндээ 18%-иар буурсан. Үүний гол буруутнаар АНУ-Хятадын худалдааны дайн нэрлэгдээд буй. Харин уг асуудалд өнгөрсөн сард талууд нэгдсэн шийдэлд хүрэхээр 90 хоногийн завсарлага аваад байгаа билээ.

Харин алтны үнийн хувьд оны эхэнд нэлээд өсөлттэй байгааг хэвлэлүүд онцолж байна. Өнөөдрийн байдлаар унц алтны үнэ 1291 ам.доллартай байгаа нь өмнөх зургадугаар сарын дунд үеэс хойших хамгийн өндөр ханшийн түвшин боллоо.

Б.Төгс