2019 онд “Эрдэнэс Тавантолгой” компанийн борлуулалт тэрбум ам.доллар давжээ

“Эрдэнэс Тавантолгой” ХК-ийн 2019 оны борлуулалтын орлого нэг тэрбум ам.доллар буюу 2.7 их наяд төгрөгт хүрчээ. Тус компани өнгөрсөн нэг жилийн хугацаанд 14.3 сая тонн нүүрс экспортолж, нэг их наяд төгрөгийн цэвэр ашигтай ажилласан тухай компаниас мэдээлсэн байна. Борлуулалтын орлого нь 1 тэрбум долларт хүрсэн анхны Монгол компани болсон тухай мэдээлэлд онцолжээ. 

Тус компанийн Гүйцэтгэх захирал Б.Ганхуяг "2016 онд анх удаа ашигтай ажилласан ч өр бүрэн дарагдаагүй байлаа. Компани 2017, 2018 онд 3.1 их наяд төгрөг, үүнээс 2018 онд 1.99 их наяд төгрөгийн орлоготойгоор 2010 оноос хойш үүссэн гадаад, дотоод өр төлбөрийг бүрэн төлж, дуусгасан. Зөвхөн 2018 онд улсын төсөвт 510 тэрбум төгрөг төвлөрүүлж, компанийн цэвэр ашгийг 335 тэрбум төгрөг байхаар төлөвлөснийг 720 тэрбум төгрөгт хүргэж, төлөвлөгөөг 2.1 дахин давуулан биелүүлсэн" хэмээн 2019 оны төгсгөлд компанийн үйл ажиллагааны талаар мэдэгджээ. "Эрдэнэс Тавантолгой” компанийн 2019 онд хэрэгжүүлсэн 9 онцлох ажлаа танилцуулсан байна.  

1. ТӨСЛҮҮДИЙГ САНХҮҮЖҮҮЛЭВ

Тавантолгой-Зүүнбаян, Тавантолгой-Гашуунсухайт чиглэлийн төмөр замын ажилд эхний ээлжинд 110 сая ам.долларын хөрөнгө оруулалт хийж,  бүтээн байгуулалтын ажлыг эхлүүллээ. Тавантолгой-Зүүнбаян чиглэлд төмөр замтай болсноор 4 чиглэлд шинээр гарц нээгдэж, зам дагасан хөгжил, их бүтээн байгуулалтууд өрнөж, ажлын байр оноор нэмэгдэж, улсын эдийн засагт дэмжлэг болсон том ажлын эхлэл тавигдлаа.
 
2. НЭГ ТЭРБУМ АМ.ДОЛЛАРЫН БОРЛУУЛАЛТЫН ОРЛОГОТОЙ АЖИЛЛАВ

“Эрдэнэс-Тавантолгой” ХК Бид  2019 онд нэг тэрбум ам.долларын борлуулалтын орлоготой ажиллан  төрийн өмчит компаниудаас Монголдоо анхдагч боллоо. Өнөөдрийн байдлаар компани 14.3 сая тонн нүүрс экспортлон, улсад 660 тэрбум төгрөгийн татвар хураамж төвлөрүүлэн, нэг их наяд төгрөгийн цэвэр ашигтай ажиллаж байна. 2019 онд 16.1 сая тонн нүүрс олборлоод байгаа нь өнгөрсөн оны мөн үетэй харьцуулахад 5 сая тонноор давуулсан үзүүлэлт юм.
 
3. 7000 АЖЛЫН БАЙР ШИНЭЭР БИЙ БОЛГОВ

УИХ-ын тогтоолыг хэрэгжүүлэх зорилгоор “Эрдэнэс-Тавантолгой Майнинг” ХХК-ийг “Эрдэнэс-Тавантолгой” ХК-ийн 100 хувийн хөрөнгө оруулалттай охин компанийг үүсгэн байгуулав. “Эрдэнэс-Тавантолгой Майнинг” ХХК, “Тавантолгой түлш” ХХК, “Тавантолгой төмөр зам” ХХК гээд Эрдэнэсчүүд бид бүл нэмж 7000-уулаа боллоо
 
4. 60 САЯ ДАХЬ ТОНН НҮҮРСЭЭ ОЛБОРЛОВ

“Эрдэнэс-Тавантолгой” ХК 2019 оны 10 дугаар сард 60 сая дахь тонн нүүрс олборлов. Мөн 2019 онд 75 сая метр куб уулын цулын ажил хийж гүйцэтгэсэн бөгөөд 2018 оны энэ үетэй харьцуулахад уулын цул 134 хувиар илүү бүтээлтэй ажиллав.
 
5. “ХУРИМТЛАЛТАЙ ХУВЬЦААТАЙ ИРГЭН” АЯНЫГ ЗОХИОН БАЙГУУЛАВ

Засгийн газрын тогтоолыг хэрэгжүүлэх хүрээнд “Хуримтлалтай Хувьцаатай иргэн” аяныг 2019 оны 10-11 дүгээр сар хүртэл 21 аймаг, 330 суманд амжилттай зохион байгуулав. Аяны хугацаанд нийт 1000 удаагийн сургалтаар 50 мянган хүнд мэдээлэл зөвлөгөө өгөн ажиллалаа. 
 
6. ISO СТАНДАРТ НЭВТРҮҮЛЭВ

ISO 9001:2015 Чанарын менежментийн тогтолцоо, ISO 45001:2018 Хөдөлмөрийн эрүүл мэнд, аюулгүй байдлын менежментийн тогтолцоо, ISO 14001:2015 Байгаль орчны менежментийн тогтолцоог нэвтрүүлж, Монголдоо анхдагч боллоо.
 
7. ЦАЛИНГ 25 ХҮРТЭЛХ ХУВИАР НЭМЭГДҮҮЛЭВ

Ажилчдын нийгмийн асуудлыг шийдвэрлэх хүрээнд олон ажил зохион байгуулж буй бөгөөд 2019 онд Хамтын гэрээнд заасны дагуу нийт ажилтны үндсэн цалинг 25 хүртэл хувиар нэмэгдүүллээ.
 
8. НИЙСЛЭЛИЙН УТААГ БУУРУУЛАВ

“Эрдэнэс-Тавантолгой” ХК нийгмийн хариуцлагын хүрээнд Улаанбаатар хотын агаарын бохирдлыг бууруулах  зорилгоор “Тавантолгой түлш” ХХК-д дэмжлэг үзүүлэн ажиллаж байна. 
 
9.  “САЯТАН ЖОЛООЧ” УРАЛДААНЫГ ЗОХИОН БАЙГУУЛАВ

Нийгмийн хариуцлагын хүрээнд тээврийн компаниуд болон жолооч нарыг дэмжин ажиллаж буй бөгөөд  2019 онд 300 сая төгрөгийн шагналын сан бүхий “Саятан жолооч” уралдаант шалгаруулалтыг амжилттай зохион байгууллаа.

Эх сурвалж: "Эрдэнэс Тавантолгой" ХК