Сурвалжилга

Экспортын тээвэрлэлтийг онцгой нөхцөлд зохион байгуулж байна

2020-05-11

Гэрэл зургийн сурвалжлагыг Б.Тошка
Өмнөговь аймгийн Гашуунсухайт боомт. 2020.03.06.07

Уул уурхайн бүтээгдэхүүний экспортын тээвэрлэлтийг онцгой нөхцөлд зохион байгуулах, нүүрс болон газрын тосны тээвэрлэлтийг сэргээх бэлтгэл ажлын хүрээнд УУХҮ-ийн сайд Д.Сумъяабазар Өмнөговь аймгийн Гашуунсухайт боомтод ажиллалаа.

Тавантолгойн уурхай, Цагаанхад дахь гаалийн хяналтын бүс, Гашуунсухайт боомтод жолооч, тээврийн хэрэгслийн халдвараас хамгаалах эрүүл ахуй, халдваргүйжүүлэлтийг хэрэгжүүлэх, тээвэрлэлтийг зохион байгуулалтад оруулах арга хэмжээг бүрэн бэлтгэсэн нөхцөлд нүүрсний экспорт эхлэх боломжтойг салбарын сайд онцгойлон анхааруулсан юм.

Мөн экспорт эхлэхэд жолооч нар Хятадын тал руу гарахдаа өдөртөө орж ирэх, Монгол Улсын нутагт буцаж ирмэгц нэг удаагийн хамгаалалтын хувцасаа устгах, тээврийн хэрэгслээ бүрэн ариутгалд оруулах зэргээр аюулгүй байдлын арга хэмжээг чанд мөрдөх хэрэгтэй. Эхний ээлжинд 300-350 хүртэлх тээврийн машин хилээр нэвтэрнэ.

Гашуунсухайт хилийн ойролцоо 50 хүртэлх хүний багтаамжтай тусгаарлах байр бэлтгэсэн бөгөөд Хятадын хилээр гарч үлдсэн тохиолдолд жолоочийг буцаж ирэхэд тус байранд шууд тусгаарлах аж.

Гашуунсухайт боомт дээр нүүрсний тээвэр эхлэхтэй холбоотой нэн шаардлагатай ариутгал халдваргүйжүүлэлтийн бодис болон хамгаалах хувцас хэрэгсэл 6 хоногийн нөөцтэй байгааг тус боомтын удирдлагууд хэлжээ. Мөн сарын нөөц бүрдүүлэхэд 105.3 сая төгрөгийн төсөв шаардлагатайг танилцуулж, шийдвэрлэж өгөхийг хүссэн байна.

Харин Шивээхүрэн боомтын нүүрсний тээвэр хийх бэлтгэл ажил үндсэндээ хангагдсан бөгөөд уул уурхайн бүтээгдэхүүн тээвэрлэхэд бэлэн болжээ. Өмнөгөвь аймгийн Шивээхүрэн боомтоор өдөрт хорио цээрийн дэглэмийн үед 200 машин гарах боломжийг бүрдүүлсэн талаар Шивээхүрэн боомтын захиргааны дарга, Хилийн цэргийн 0166 дугаар ангийн захирагч Б. Мөнхбат ярьсан байна.

Ариутгалын түр төхөөрөмжийг шинээр суурилуулж, хилийн шалгалтын өмнө бүх ариутгалыг хийхээр шийдвэрлэжээ. Энэ байгууламжаар ариутгал халдваргүйжүүлэлт хийхэд нэг машинд 10 литр ус зарцуулах ба өдөрт 200 машин ариутгах хүчин чадал бүхий түр байгууламжийг өргөтгөх үүргийг аймгийн Онцгой комисст үүрэг болгосон байна.

Ариутгал хийгдсэний дараа гаалийн болон мэргэжлийн хяналтын үзлэг шалгалт хийгдэх юм. Боомтод зарцуулагдах 100-170 сая төгрөгийг Нарийнсухайтын ордод үйл ажиллагаа явуулж буй дөрвөн компани гаргахаар шийдвэрлэжээ.

СЭДЭВ

Ашигт малтмал

Эрдэс

Стратегийн орд

Дэд бүтэц

Судалгаа