Бүрэн автомат технологитой тэсрэх бодисын үйлдвэр ашиглалтад орно

“Эрдэнэт үйлдвэр” ТӨҮГ  хүдрийн ил уурхайн дэргэдээ Эмульсийн тэсрэх бодисын шинэ үйлдвэр байгуулж байна. Одоогоор тус үйлдвэрийн барилга, угсралтын ажил 60%, инженерийн шугам сүлжээний ажил 80 орчим хувь, төслийн  нийт гүйцэтгэлийн ажил 50 гаруй хувьд хүрснийг компани мэдээллээ.

Үйлдвэрийг 2020 оны хөрөнгө оруулалтаар барьж байгаа аж.  Хэдийгээр “Эрдэнэт үйлдвэр” 1993 онд Монголд анх удаа 10 мянган тонн тэсрэх бодис үйлдвэрлэх хүчин чадалтай  Эмульсийн тэсрэх бодисын үйлдвэрийг байгуулж өнөөдрийг хүртэл ажиллуулж байгаа ч цаашид аюулгүй ажиллагааг хангаж, эрсдэлээс хамгаалах үүднээс  дахин шинэ үйлдвэр байгуулахаар болжээ.

Үйлдвэрийн бүтээн байгуулалтыг “Монголиан Инвестмент корпорэйшн” ХХК хариуцаж байгаа аж.  Бүрэн автомат технологитой тэсрэх бодисын үйлдвэр ашиглалтад орсноор жилдээ 15 мянган тонн  бүтээгдэхүүн үйлдвэрлэнэ гэсэн төлөвлөгөөтэй байна.

Г.Идэр