Хятад төмрийн үйлдвэр байгуулахад тавигдах шинэ журам мөрдөнө 

Хятадын Үндэсний хөгжил, шинэтгэлийн хорооноос (NDRC) төмөрлөгийн үйлдвэр барих, хүчин чадлыг өргөтгөх төслүүдэд шинэ шалгуур тавих болжээ. Энэхүү өөрчлөлт нь тус улсын ган үйлдвэрлэлийн хүчин чадлыг танах, нүүрстөрөгчийн давхар ислийн ялгаруулалтыг бууруулах, аж үйлдвэрийн гол бүс нутгийн байгаль орчны нөхцөл байдлыг сайжруулах хүрээнд хийгдэж буй аж.

Шинэ журмаар, тухайлбал Бээжин, Тянжин, Хэбэй, Янзцы болон Сувдан гол, Шанси мужийн Фэнвэйн тал зэрэг бүс нутгуудад шинэ үйлдвэр байгуулах тусгай зөвшөөрөл авахын тулд хуучирсан тоног төхөөрөмжтэй үйлдвэрлэлээ хаах шаардлага тавигдаж байна. Муж, автономит бүс нутаг, хотууд нь шинэ үйлдвэрийн хүчин чадал нэмэх тохиолдолд бусад бүс нутагтай харилцан тохиролцоно. Өөрөөр хэлбэл, шинэ хүчин чадлыг нэмэх бол заавал хуучин үйлдвэрлэлийг хааж Хятадын Засгийн газраас заасан тодорхой хязгаарлалтаас давахгүй гэсэн үг.

Өнөөгийн байдлаар, Хятадад ашиглалтад орох гэж буй шинэ төслүүд бий. “Baowu” группын бүтцэд багтдаг “Baosteel” компани Гуандун муж дахь “Zhangang” үйлдвэрийн III модулийг зургадугаар сард ашиглалтад оруулна. Ляонин мужид “Ansteel” компанийн жилд 2 сая тонн ган, 2.2 сая тонн төмөр үйлдвэрлэх хүчин чадалтай үйлдвэр ашиглалтад орж байна.

Э.Од