АНУ-ын шинэ хориг  Оросын нүүрсэнд саад учруулж байна

Ч.Сансар

ОХУ-ын эсрэг АНУ-ын тогтоосон шинэ хориг арга хэмжээ нь Энэтхэгийн Оросоос худалдан авдаг эрчим хүчний нүүрсний хэмжээг бууруулах өндөр магадлалтай. Учир нь шинэ хориг арга хэмжээний жагсаалтад Оросын шилдэг экспортлогч SUEK болон Mechel зэрэг компаниуд орсон аж.

Орос улс өмнө нь Энэтхэгийн импортын нүүрсний зах зээлд жижигхэн тоглогч байсан. Харин Украины дайнаас болж Москвагийн эсрэг барууны орнууд хориг арга хэмжээ авсны дараа Орос Энэтхэг рүү экспортоо эрс нэмэгдүүлж эхэлсэн.

АНУ-ын тогтоосон хамгийн сүүлийн хориг арга хэмжээ нь Оросын төлбөрийн систем, санхүүгийн тогтолцоо, эрчим хүчний үйлдвэрлэл зэрэг салбарууд руу чиглэсэн.

"Шинэ хориг арга хэмжээний улмаас Энэтхэгийн томоохон компаниуд Оросоос нүүрс худалдаж авна гэж би бодохгүй байна" гэж Энэтхэгийн Гоа мужид болсон Coaltrans хурлын үеэр Энэтхэгийн томоохон худалдааны компанийн төлөөлөгч Ройтерс агентлагт ярьжээ.

Нүүрсний тээвэрлэлт зогсохгүй, гэхдээ хүмүүс Оросын нүүрсийг худалдан авахдаа эргэлзээ төрүүлж байна. Индонез, Австрали, Өмнөд Африк зэрэг бусад нүүрсний экспортлогчид тус хориг арга хэмжээнээс хожно гэж Энэтхэгийн өөр нэг худалдааны компанийн төлөөлөгч хэллээ.

Хөлөг онгоцны хяналтын тоо баримтаас харахад Энэтхэгийн JSW групп, Vedanta болон Arcelor Mittal Nippon Steel India консорциум нь сүүлийн зургаан сарын хугацаанд Оросын эрчим хүчний нүүрсийг хамгийн их импортолсон байна.
Оросын эрчим хүчний нүүрсний нийлүүлэлт 2023 онд 19%-иар нэмэгдэж, 10.06 сая тонн буюу Энэтхэгийн шатахууны импортын бараг 6%-д хүрсэн гэж Bigmint зөвлөх компани мэдэгдэв.

Энэтхэг улс Украины дайн эхэлснээс хойш Оросын далайн тээвэрлэлтийн түүхий нефтийн хамгийн том худалдан авагч болсон. Энэхүү худалдаанд АНУ-ын шинээр тогтоосон хориг арга хэмжээ сүүлийн үед бэрхшээл учруулж байна.

Эх сурвалж: mining.com