"Трансвест Монголиа" ХХК нь "Mongolia Mining 2024" үзэсгэлэнгийн ерөнхий ивээн тэтгэгчээр ажиллаж байна

Монголын уул уурхайн салбарын хамгийн шилдэг компаниудыг нэгтгэдэг “Mongolia Mining 2024” олон улсын уул уурхайн үзэсгэлэн   13 дахь жилдээ зохион байгуулагдах гэж байна. Энэ жил Mongolia Mining үзэсгэлэнд жил бүр ерөнхий ивээн тэтгэгчээр оролцдог Трансвест Монголиа ХХК-ийн 15 жилийн ой тохиож байгаа бөгөөд өнөө жил мөн Ерөнхий ивээн тэтгэгчээр оролцож байна . Тиймээс  бид энэ удаагийн ярилцлагад  Трансвест Монголиа ХХК-г онцлон тус компанийн Худалдаа маркетингитйн захирал Д.Болдсүх- тэй ярилцлаа.

Сайн байна уу, танай хамт олонд 15 жилийн ойн баярын мэнд хүргэе!  Юун түрүүнд та  Трансвест Монголиа компанийн анх үүсгэн байгуулагдаж байсан түүхээс хуваалцахгүй юу?

Сайн сайн байна уу? Манай компанийн гүйцэтгэх захирал Дэвид Төрнбулл анх 2009 онд УБЕГ 100% гадаадын хөрөнгө оруулалттай аж ахуйн нэгж бүртгүүлж байсан нь саяхан мэт боловч хэдийн 15 жил өнгөрчээ. Энэ хугаццанд бид Монголын зах зээлд уул уурхайн тоног төхөөрөмж нийлүүлэгч шилдэг компаниудын нэг болон бэхэжсэн байна.

1.5 жил гэдэг тийм ч урт хугацаа биш  хэдий ч Трансвест Монголиа компанийг мэдэхгүй хүн гэж бараг байхгүй болжээ. Богино хугацаанд хийсэн бүтээн байгуулалт, ололт амжилтынхаа нууцаас хуваалцвал?

Бид Монголын зах зээлд хэрхэн амжилттай ажиллах урт болон дунд хугацааны стратеги төлөвлөгөөгөө сайтар гаргаж, хэрэглэгчид болон зах зээлийн судалгааг мэргэжлийн байгууллагуудтай хамтран боловсруулж үйл ажиллагаагаа явуулдаг нь богино хугацаанд амжилт бүтээл гаргахад чухал хувь нэмэр үзүүлсэн. Мөн сургалт, хүний хөгжилд онцгойлон анхаарч, чадварлаг хамт олон бүрдүүлсэн болон хөрөнгө оруулагч Япон улсын Сумитомо Корпораци, Канад улсын СМС тоног төхөөрөмж компаниудын ажлын арга барил, туршлага, менежментийг Монголд нутагшуулан нэвтрүүлэн ажиллаж байгаа давуу талууд нь амжилтын маань үндэс юм.

Трансвест Монголиа компани  цаашдаа ч одоогийн байр суурь, нэр хүндээ хадгалан, илүү их ололт амжилт, шинэчлэлт, өөрчлөлт, ахиц дэвшлийг салбартаа авчирсаар байх болно гэдэгт итгэж байна. Та дараагийн он жилүүдийг хэрхэн харж, төлөвлөж байна вэ?

Бид ойрын ирээдүйг маш өөдрөгөөр харж байна. Монгол улсад үйл ажиллагаа явуулж байгаа төр хувийн хэвшлийн бүх аж ахуйн нэгжүүд, уул уурхайн компаниуд маань шилдэг технологид хөрөнгө оруулж, хөдөлмөрийн бүтээмжийг хамгийн өндөр, ашиглалтын зардлыг хамгийн бага түвшинд байлгадаг Комацу брэндийн техник тоног төхөөрөмжөөр уулын үндсэн ажлаа явуулдаг болсноор бид Монголын зах зээлд шилдэг байх байр сууриа хадгалах боломжийг улам бүр нэмэгдүүлж байгаа.

Өнөө жилийн Mongolia Mining 2024 үзэсгэлэнд Ерөнхий ивээн тэтгэгч байгууллагаар хамтран ажиллаж байгаа гэж сонссон. Үзэсгэлэнгийн үеэр хамтрагч, хэрэглэгч нартаа ямар бүтээгдэхүүн үйлчилгээг  танилцуулахаар зорьж байна? 

Бид энэ үзэсгэлэнд Комацу үйлдвэрийн дугуйт ачигч болон гинжит бульдозер танилцуулж, өөрийн талбай дээрээ шинэ загварын экскаватор болон борлуулалтын дараах засвар үйлчилгээ, бүтээгдэхүүний дэмжлэгийн талаар танилцуулга хийж үзэсгэлэн зохион байгуулах ажлын хэсэгтэй хамтран ажиллаж байна.

Трансвест Монголиа компани бараг сүүлийн есөн жилийн турш Mongolia Mining 2024 үзэсгэлэнд Ерөнхий ивээн тэтгэгчийн байр сууриа хадгалан оролцож байгаа. Ер нь үзэсгэлэнд оролцохын давуу талын талаар ямар бодолтой явдаг вэ?

Тус үзэсгэлэнд Ерөнхий ивээн тэтгэгчээр оролцож Монголын уул уурхайн компаниудын төлөөлөл дэлхийн шилдэг техник технологитой эх орондоо танилцах, ажил хэргийн холбоо үүсгэх, уулзаж танилцах боломж олгодог учир бид энэ үзэсгэлэнд онцгой ач холбогдол өгч оролцдог юм.

Цаашид ч энэ үзэсгэлэн улам бүр цар хүрээгээ тэлээд гадаад дотоодын олон үйлдвэрүүд болон хэрэглэгчид оролцож байгаасай гэж манай хамт олон үзэж, үзэсгэлэнгийн зохион байгуулагчидтай нягт уялдаа холбоотой хамтран ажилладаг.