Хятадын “Бүс ба зам” санаачилгын хүрээнд уул уурхайн салбарт оруулсан хөрөнгө дээд амжилт тогтоолоо

Ч.Сансар

Өнгөрсөн онд "Бүс ба Зам" санаачилгын хүрээнд БНХАУ гадаадад 21.4 тэрбум ам.долларын хөрөнгө оруулалт уул уурхайн салбарт хийж, дээд амжилт тогтоосон билээ. Хятадын засгийн газар эрчим хүчний шилжилтэд шаардлагатай түүхий эдийн нийлүүлэлтэд  ихээхэн анхаарч байгаа гэж Австралийн Griffith Asia Institute болон Хятадын Ногоон санхүүжилт, хөгжлийн төвийн хамтран гаргасан тайланд дурджээ.

2013 онд Хятадын засгийн газраас хэрэгжүүлж эхэлсэн “Бүс ба Зам” нь худалдаа, эдийн засгийн өсөлтийг дэмжсэн, бүс нутагт нөлөөгөө нэмэгдүүлэхийг зорьсон томоохон дэд бүтцийн санаачилга юм. Одоогоор Хятад улс “Бүс ба Зам” санаачилгын хүрээнд дэлхийн 149 орны уул уурхай, эрчим хүч, зам тээвэр зэрэг салбарт 1.1 их наяд гаруй долларын хөрөнгө оруулаад байна. Хамгийн их хөрөнгө оруулалт эрчим хүчний салбарт хийгдэж, нийт хөрөнгө оруулалтын 32.5%-ийг эзэлсэн. Уул уурхайн салбарт оруулсан хөрөнгө 17.6% хүрч, хоёрдугаар байранд орсон.

Хятад улс Африк, Латин Америк, Зүүн Өмнөд Азид идэвхтэй үйл ажиллагаа явуулдаг гэж тайланд дурджээ.

Хятад улс дэлхийн ашигт малтмалын олборлолт, боловсруулах салбарт тэргүүлдэг. Жишээ нь Хятад дэлхийн бал чулууны нөөцийн 80 гаруй хувийг эзэмшдэг бол литий, никель, кобальт, бал чулууг боловсруулах хүчин чадлын 50 гаруй хувийг эзэмшдэг аж.

“Бүс ба Зам” санаачилга цэвэр эрчим хүчний салбарт (нар, салхи, усан цахилгаан) 11.8 тэрбум ам.долларын хөрөнгө оруулж, дээд амжилт тогтоосон байна. Энэ нь өнгөрсөн жилийн нийт эрчим хүчний салбарт оруулсан хөрөнгийн 30 орчим хувийг эзэлж байгаа нь 2017 оноос хойших хамгийн өндөр үзүүлэлт юм. Мөн БНХАУ гадаадад чулуужсан түлшний (нүүрс, газрын тос, хий) томоохон хөрөнгө оруулагч хэвээр байгаа билээ.

Griffith Asia Institute-аас 2025 онд тус санаачилгын  хүрээнд хөрөнгө оруулалт болон бүтээн байгуулалтын ажлууд үргэлжлэн өснө гэж таамаглаж байна. Энэ нь "Шинэ гурав" гэж Хятад улсын нэрлээд байгаа уул уурхай, технологи, ногоон эрчим хүч зэрэг гурван салбарт байнгын шинэ боломжуудыг бий болгож байгаа аж.

Эх сурвалж: www.mining.com