Финланд нүүрсээр галладаг хамгийн сүүлчийн дулааны цахилгаан станцаа хаалаа

Т.Бямбанаран

Финланд улс нүүрсээр ажилладаг хамгийн сүүлчийн дулааны цахилгаан станцаа энэ Мягмар гарагт бүрмөсөн хаалаа. Хельсинки хотноо байрлах Helen эрчим хүчний группийн удирдлаган дор ажиллаж байсан Салмисари станц нь 175 МВт цахилгаан, 300 МВт дулаан үйлдвэрлэж байжээ. 

Финланд сүүлийн жилүүдэд нар, салхи зэрэг сэргээгдэх эрчим хүч рүү шилжсэнээр нүүрсний хэрэглээ огцом буурсан. Өмнөх Засгийн газар нь 2019 онд баталсан хуулиндаа 2029 оноос нүүрс хэрэглэхийг хориглосон нь үүнд нөлөөлсөн аж. 

Салмисари станцын үйлдвэрлэж байсан эрчим хүчийг нөхөхийн тулд Helen компани хаягдал дулаан, дулааны насос ашиглахын зэрэгцээ модны үртэс зэргээс эрчим хүч гаргана авна гэжээ.

Гэхдээ 2030 он гэхэд компанийн хүлэмжийн хийн ялгарлыг 1990 оны түвшний 5%-д хүргэж, 2040 он гэхэд бүх шатах материалыг бүрэн зогсоох төлөвлөгөөтэй байгаагаа онцлов.

Европ тивийн хэмжээнд Финланд улсын цахилгаан, эрчим хүч Швед болон Норвегийн дараа орох хямд үнэтэй байдаг. Үүнээс гадна, Helen компани энэ жил төвлөрсөн халаалтын дундаж үнийг ойролцоогоор 5.8%-иар бууруулахаар төлөвлөж байна.

Станц хаагдсанаар тус компанийн нүүрсхүчлийн хийн ялгаруулалт өнгөрсөн оноос 50%-иар, Финланд улсын хэмжээнд ойролцоогоор 2%-иар буурах тооцоотой байна.

Эх сурвалж: www.reuters.com