Б.Жавхлан: Нүүрснээс алдсан орлогоо зэсээр нөхсөн

Засгийн газрын өнөөдрийн /2025.04.02/ хуралдаанаар хэд хэдэн асуудлыг хэлэлцэж, эцэслэн шийдвэрлэлээ.

Нэгдүгээр улирлын нийт дүнгээр нүүрс 17.4 сая.тонн, төмрийн хүдэр 1.8 сая тонн экспортолсон нь өмнөх оны мөн үетэй ижил түвшинд байгаа бол зэсийн баяжмалын экспорт 456 мянган тоннд хүрчээ.

Мөн энэ сарын 01-ний байдлаар гадаад валютын улсын нөөц өмнөх долоо хоногоос 305 сая ам.доллароор нэмэгдэж, таван тэрбум ам.долларт хүрсэн байна. Энэ талаар Сангийн сайд Б.Жавхлан танилцуулахдаа “Экспортыг дэмжих, Монгол Улсын валютын нөөцийг нэмэгдүүлэх ажлын хэсгийн танилцуулгаа Засгийн газарт хийлээ. Манай ажлын хэсэг байгуулагдаад гурван долоо хоног болж байна. Бидний эцсийн зорилго нь Монгол Улсын валютын нөөцийг нэмэгдүүлэх бүх боломжийг дайчлан ажиллах. Төв банкны валютын нөөцийг нэмэгдүүлэхэд бүх тал өндөр ач холбогдол өгч байгаа. Үүнтэй холбоотойгоор Төв банкны ерөнхийлөгч, Сангийн сайд, Санхүүгийн зохицуулах хорооны дарга, Хадгаламжийн даатгалын корпорацын дарга нараас бүрдсэн Санхүүгийн тогтвортой байдлын зөвлөлийг идэвхтэй ажиллуулах шаардлага үүсч байгаа. Энэ зөвлөл долоо хоног бүрийн Мягмар гаригт хуралдаж байгаа. Нөөцийг нэмэгдүүлэх ажлыг үндсэн хоёр агуулгаар харж байгаа. Нэгдүгээрт, экспортын биет хэмжээг нэмэгдүүлэх, хоёрт, санхүүгийн зах зээлд дэх нөөц боломжоо дайчилж валютын нөөцийг нэмэгдүүлэх. Өнгөрсөн долоо хоногт гол худалдан авагчидтай уулзалт хийсэн. Мөн Экспортыг дэмжих, валютын нөөцийг нэмэгдүүлэх ажлын хэсэг гуравдугаар сарын 13-нд байгуулагдсанаас хойш Монгол Улсын валютын нөөц таван тэрбум ам.долларт хүрлээ. Энэ жилийн нэгдүгээр улиралд нүүрсний үнэ нэлээд цохилтод орсон ч зэсийн экспорт сайн байлаа. Зэсийн биет хэмжээ өнгөрсөн оны мөн үеэс 40%-иар нэмэгдэж, татварт төвлөрүүлсэн хэмжээ нь ч төдий хэмжээгээр нэмэгдлээ. Өөрөөр хэлбэл, нүүрснээс алдсан орлогоо зэсээр нөхсөн. Хоёрдугаар улирал нь эдийн засгийн идэвхжилийн үе тул Засгийн газрын хөрөнгө оруулалт дээр онцгой анхаарч ажиллана” гэлээ.   

Байгалийн хийн хоолой барих төслийн байгаль орчинд нөлөөлөх байдлын үнэлгээг энэ оны гуравдугаар улиралд хийнэ

Түүнчлэн Засгийн газрын албан ёсны цахим хуудаст дурдсанаар дараах асуудлыг хуралдаанд танилцуулж, мэдээлэл өгчээ.

Тухайлбал, Монгол Улсын нутаг дэвсгэрээр дамжуулан ОХУ, БНХАУ руу байгалийн хий нийлүүлэх хоолой барих төсөл хэрэгжиж байгаа билээ. Тус төслийн тухайд, Монгол Улсын талаас “Эрдэнэс Монгол” ХХК-ийн “Эрдэнэс Газ” төслийн нэгж, ОХУ-ын талаас “Газпром” НХН-ийн хөрөнгө оруулалттай “Газопровод Союз Восток” ХХК нар төслийг хэрэгжүүлэхээр хамтран ажиллаж байгаа юм. Төслийн техник, эдийн засгийн үндэслэлийг 2022 оны нэгдүгээр сард батлуулж, инженерийн хайгуул судалгааны ажлуудыг мөн онд гүйцэтгэж, нарийвчилсан зураг төслийн баримт бичгүүдэд магадлал хийх ажлыг 2024 онд дуусгаж, шаардлагатай газрыг улсын тусгай хэрэгцээнд авсан юм. Харин 2025 оны гуравдугаар улиралд багтаан байгаль орчинд нөлөөлөх байдлын үнэлгээ хийх ажлыг гүйцэтгэхээр төлөвлөж байгаа гэдгийг Монгол Улсын Шадар сайд С.Амарсайхан Засгийн газрын гишүүдэд танилцууллаа.

Байгалийн хий дамжуулах хоолой нь хойд хилээс урд хил хүртэл 958,6 км үргэлжилж, зургаан аймаг, 22 сумын нутгаар дайран өнгөрөх бөгөөд газар доогуур тавигдах юм. ТЭЗҮ-ийн дагуу төсөл нь техникийн талаас хэрэгжих бүрэн боломжтой, эдийн засгийн үр өгөөжтэй, байгаль орчинд сөрөг нөлөө үзүүлэхгүй ажээ. Мөн төсөл хэрэгжсэнээр гадаадын шууд хөрөнгө оруулалтын хэмжээ нэмэгдэж эдийн засаг тэлнэ гэж үзэж байгаа юм. Барилга угсралтын үед 12 000, ашиглалтын үед 1000 гаруй ажлын байр бий болох аж. Түүнчлэн байгалийн хий нь эрчим хүчний хямд эх үүсвэр бөгөөд байгалийн хийгээр ажилладаг дулаан, цахилгааны станцууд барьж байгуулснаар эрчим хүчний системийн маневрлах чадварыг нэмэгдүүлж, эрчим хүчний системийн тогтворжилт дээшлэх боломжтой юм. Тус зураг төслийн баримт бичигт Дархан, Улаанбаатар, Чойр, Сайншанд руу байгалийн хий авах гаргалгааг тусгаж өгсөн учир дотооддоо байгалийн хий авч ашиглан агаарын бохирдлын асуудлыг бүрэн шийдвэрлэх боломжтой гэлээ.

“Эрдэнэс Тавантолгой”-н 2024 оны үлдсэн ногдол ашгийг энэ сард олгоно

”Эрдэнэс Тавантолгой” ХК-ийн 2024 оны ногдол ашгийн талаар Засгийн газрын хуралдаанд танилцуулга хийжээ.

“Эрдэнэс Тавантолгой” ХК-ийн үйл ажиллагааны үр дүнгийн жилийн эцсийн гүйцэтгэлд үндэслэн 2024 оны цэвэр ашгийн дүнг тооцож үзсэний үндсэн дээр нийт цэвэр ашгийн зохих хувийг хуульд заасны дагуу ногдол ашиг хэлбэрээр иргэдэд хуваарилж байна. Тус компанийн ТУЗ-ийн тогтоолоор 2024 оны цэвэр ашгаас 1,072 хувьцаатай нэг иргэнд 350 мянган төгрөгийн ногдол ашигийг гурав хувааж олгохоор шийдвэрлэсэн бөгөөд гурав дахь удаагийн олголтыг энэ сард хийнэ. Хувь хүний орлогын албан татварыг хассан дүнгээр 93,500 төгрөг, иргэн, аж ахуйн нэгжид нийт 308 тэрбум төгрөгийн ногдол ашиг олгох юм.

“Эрдэнэс Тавантолгой” ХК нь 2024 оны гүйцэтгэлээр 30.4 сая тонн нүүрс олборлож, 3.0 тэрбум ам.долларын үнэлгээтэй 29.6 сая тн нүүрс борлуулж, улсын төсөвт татвар, хураамж хэлбэрээр нийт 3.5 их наяд төгрөг төвлөрүүлжээ.