Цэнхэр чиптэй хувьцаануудын дунд Газпромын хувьцааны ханш хамгийн их уналаа

Ч.Сансар

Гуравдугаар сарын 28-ны баасан гарагийн арилжаагаар Газпромын ханш 5.4%-иар буурч, нэгж хувьцаа нь 146.87 рубль болсон байна.

Газпромын хувьцаа Москвагийн хөрөнгийн биржийн индекс (IMOEX)-ийн бусад хувьцаанаас илүү хүчтэй унасан байна. Украины арми Курск мужид байрладаг "Суджа" хий хэмжигч станцад цохилт өгч, устгасан гэсэн Оросын Батлан хамгаалах яамны мэдэгдлийн дараа "Газпром"-ын хувьцааны ханш буурсан аж.

Курск муж дахь “Суджа” хий хэмжигч станцыг устгасан нь зах зээлийн уналтад нөлөөлсөн гэж “Альфа Инвестментс” компанийн шинжээчид мэдэгдэв. Энэ үйл явдал нь Орос, Европын Холбооны харилцаа сайжирч, Украины нутгаар дамжин өнгөрөх байгалийн хийн тээвэрлэлт сэргэвэл Газпромоос ЕХ-нд нийлүүлэх байгалийн хийн хэмжээ буурахад нөлөөлнө гэж шинжээчид үзэж байна.

2025 оны 1 дүгээр сарын 1 хүртэл “Суджа” станцаар дамжуулан Европ руу хий нийлүүлдэг байсан. Оросын Газпром, Украины Нафтогаз нарын байгуулсан гэрээний хугацаа дууссаны дараа нийлүүлэлт зогссон. Газпром нь Оросын хийг хоолойгоор дамжуулан экспортлох онцгой эрх эзэмшдэг билээ.

Гуравдугаар сарын 28-нд Газпромын хувьцааны арилжаа унасан ч Москвагийн бирж дээр тэргүүлж, тоо хэмжээгээрээ T-Technology болон Сбербанк компаниудыг гүйцэж түрүүллээ. Газпромын хувьцааны арилжаа 18.2 тэрбум рубльд хүрсэн байна. Москвагийн бирж дээр томоохон хувь (13.45%) эзэлдэг Газпром нь биржийн уналтад нөлөөлсөн. Москвагийн биржийн индекс (IMOEX) 2.58%-иар буурч, 3004.47 нэгж болжээ.

"Газпром"-ын хувьцаа ес дэх өдрөө дараалан буурч байгааг “BKS Investment World” хөрөнгө оруулалтын сан онцлов. Хэрэв сөрөг динамик хэвээр байвал хувьцааны ханш 144 рубль хүртэл унахыг үгүйсгэхгүй юм.

BKS Investment World-ийн шинжээчид “Суджа” станцыг устгасан нь Газпромыг Украинаар дамжуулан Оросын байгалийн хийн транзитыг сэргээнэ гэж найдаж байсан хүмүүсийн хувьд хүртэл тийм чухал үйл явдал байгаагүй гэж үзэж байна. Хийг хоолойгоор дамжуулахад даралтат компрессорууд чухал үүрэг гүйцэтгэдэг бөгөөд уг төхөөрөмж нь энэ станцад байгаагүй тул түүнийг сэргээхэд хэдэн долоо хоног шаардагдах юм байна.

“Альфа Инвестментс” компанийн шинжээчид Газпромын хувьцааны хэтийн төлөвт тун болгоомжтой хандаж байна. Хувьцааны өсөлт нь геополитикоос ихээхэн хамаарах тул нөхцөл байдал сайжрахгүй бол Газпромын хувьцааны ханшны өсөлт хойшлогдож магадгүй гэж шинжээчид анхаарууллаа. Хятад улстай "Сибирийн хүч 2" хийн хоолойн гэрээ байгуулбал борлогдохгүй байгаа байгалийн хийн зарим хэсгийг 2030 он гэхэд Ази руу чиглүүлэх боломжтой болох боловч энэ талаар одоогоор нарийн мэдээлэл алга байна. Альфа-Банкны шинжээчид Газпромын хувьцааг 12 сарын хугацаанд 205 рубль хүргэхийг зорьж байна.

Эх сурвалж:  www.rbc.ru